Qaqortoq: KAIR naannerusumik mittarfiliornissamik sulissuteqartoq
Kalaallit Airportsip aningaasaqarneq imminut ataqatigiissinniarlugu Qaqortumi naannerusumik mittarfiliornissaq timmisartoqarfiullu illutassaanik mikinerusunik sanaartornissaq sulissutigaa.
Aningaasaqarnermut Akileraartarnermullu Ataatsimiititaliap attaveqaqatigiinnermut naalakkersuisoq Karl Frederik Danielsen, Qaqortumi mittarfiliornissamut neqeroortitsisimagaluarneq pillugu pingasunngormat ammasumik siunersiueqatigivaa.
Siunersiueqtigiinnermi paasinarsisimavoq, Kalaallit Airportsip sulissutigigaa, 2021-mi nutaamik neqeroortitsisoqarnissaa. KNR taamatut allappoq.
Kalaallit Airportsip ilaatigut mittarfissaq aallaqqaammut 1499 miiterisut takitigisussatut pilersaarutaasoq naannerulersinniarpaa, timmisartoqarfiullu illutassai mikinerulersinniarlugit, KNR oqaluttuarpoq.
Suliniutit aqqutigalugit aningaasaliissutit iluini mittarfiliortoqarssinnaanera anguniarneqarpoq.
Politikkikkut akuerineqartariaqartoq
Ingerlatseqatigiiffiulli Inatsisartuni politikkerit akuersissuteqartinnagit mittarfissaq naannerulersissinnaanngilaa, Inatsiartut tassaammata mittarfiup takissusissaanik aalajangiisimasut.
Aggustip 20-ani saqqummiunneqarpoq, Kalaalit Airports Qaqortumi timmisartoqarfiliornissamut neqeroortitsinermik unitsitsiinnartariaqarsimasoq. Tassunga pissutaasimaavoq, ingerlatseqatigiiffiup sanasussamik piffissami sivisuumi isumqatiginninniareerluni isumaqatigiissuteqarsinnaasimannginnera.
Sanasut timmiasrtoqarfiliornissamut akigitiniagaat, Kalaallit Airportsip missingersuutaanit qaffasinnerusimapput.
Taamaatitsiinnarneq Kujataani, ukiorpassuit ingerlaneranni Qaqortumi timmisartoqarfeqarnissamik kissaateqarfiusimasumi annertuumik ernumalersitsisimavoq.