Qaqortoq: Hans Hedtoft pillugu saqqummersitsineq
M/S Hans Hedtoftip umiunerata nallerfia Qaqortup katersugaasiviani immikkut saqqummersitsinermik malunnartinneqassaaq. Saqqummersitsinermi isiginnaagassiaq naatsoq nersornaasigaq takutinneqaqqaassaaq.
Arfininngorneq januaarip ulluisa 30-ianni Qaqortup Katersugaasiviani saqqummersitsinermi akunnerit Hans Hedtoftip atugai kingulliit pissanganartoqaqisut malinnaaffigineqarsinnaassapput.
- Arfininngorneq januaarip ulluisa 30-ianni 1959 M/S Hans Hedtoft umiuvoq periarfeerullunilu. Inuit 95-it - angutit, arnat meeqqallu ajunaarput. Ullumimut allaat sunniuteqarpoq malunnartinneqartariaqarlunilu, Qaqortup Katersugaasiviata pisortaa Dan Ullerup tusagassiutinut nalunaarummi oqarpoq
Isiginnaagassiaq nersornaasigaq
Saqqummersitsineq kalaallisut, danskisut tuluttullu ingerlassaaq - eqqumiitsuliortunillu Lars Wintherimit siulersorneqartunit suliaalluni. Suleqatigiit Sverigemit, Islandimit, Danmarkimit Kalaallillu Nunaannit aggersunik inuttaqarput.
Ammaanersiornermi immikkut saqqummersitsinerup saniatigut oqalugiartoqassaaq, Qaqortup TV-iani allakaatitamik takutsisisoqassalluni. Isiginnaagassiaq naatsoq nersornaasigaq 'Hedtoft' aamma Youtubemi takuteqqaarneqassaaq.
Facebookikkut malinnaasoqarsinnaavoq
Ammaanersiornermut takkussinnaanngikkaani - aamma Corona eqqarsaatigalugu – ammaanersiorneq Qaqortup Katersugaasiviata Facebookimi quppernerani malinnaavigineqarsinnaavoq.
Immikkut saqqummersitsineq februaarip ulluisa 28-iata tungaanut Qaqortup Katersugaasivianut takuniarneqarsinnaavoq, kingornalu nunatsinni Katersugaasivinnut allanut neqeroorutigineqassalluni.
