Qaqortoq: Angut tarnimigut nappaatilik politiinit tigusarineqarpoq
Qaqortumi Sivinganikasiani ulorianartumik pisoqarunnaarpoq, angut politiinit tigusarineqarpoq.
Politiit nalilersuereernermi kingorna aalajangerput Sivinganikasiani inimut isertissallutik ullumi marlunngornermi nalunaaqutaq 15.00.
Politiit angut tarnimigut nappaatilik tigusaraat, tigusarineqarneranut atatillugu ajoqqusertoqanngitsoq politiit ilisimatitsipput.
- Namminerminut avatangiisiminullu innarliisinnaanera pissutaalluni tigusarineqarpoq, maanna nakorsamit misissorneqassaaq, tassani aalajangerneqassaaq napparsimavimmut unitsinneqassanersoq, politiinit Johan Westen Sermitsiaq.AG-mut oqarpoq.
Navianartumik pisoqarsimasinnaasoq
Politiit Sermitsiaq.AG-mut ilisimatitsissutigaat, pineqartoq angerlarsimaffimmini aallaaserluni mattusimasimasoq.
- Angut inunnut allanut qunusaarinngilaq, taamaattoq ajornerusumik pisoqarsinnaanera pissutaalluni politiit inissiap eqqaaniipput ataasinngornerup ualineraniilli, politiit ilisimatitsipput.
Sivinganikasiani aqqusinermik matusineq maanna atorunnaarpoq.