Naalakkersuisooqatigiilersut
Qaqortoq mittarfittaassaaq
Qaqortup Narsallu akornanni mittarfik, aamma Tasiilami, Ilulissallu mittarfiata tallineqarnissaa. Tamakkuupput Siumup, Demokraatit aamma Atassutip Naalakkersuisooqatigiinnissaminni isumaqatigiissutaasa ilaat
Siumup, Demokraatit Atassutillu siulittaasuisa naalakkersuisooqatigiinnissamut isumaqatigiissutertik sisamanngornermi atsioqatigiiffigalugu saqqummiuppaat.
Naalakkersuisooqatigiinnissamut isumaqatigiissut qulequtaqartoq ‘Ataatsimoorneq, toqqissisimaneq aamma ineriartorneq’ 29-nik immikkoortortoqarpoq naalakkersuisooqatigiilertussat anguniagassaannik.
Atuaruk: Siumut, Atassut aamma Demokraatit naalakkersuisunngortitsipput
Atuaruk: Uran aalajangiisuuvoq
Mittarfiit avataanit aningaasaliiffigineqarlutik sananeqassapput
Naalakkersuisuutitaqalersussat nunatsinni angallanneq innuttaasunut inuussutissarsiornermullu iluaqutaasussanngorlugu aaqqissuuteqqinniarpaat.
Tamanna Siumup, Demokraatit aamma Atassutip Naalakkersuisooqatigiinnissamik isumaqatigiissutaani ilaatigut allassimavoq.
Taamaattumik Naalakkersuisuutitaqalersussat ingerlatseqateqatigiiffimmik A/S-imik pilersitsiniarput avataanit aningaasalersorneqarneq aallaavigalugu sulisussamik.
Ingerlatseqatigiiffissap nutaap pilersinneqarniartup, Qaqortup Narsallu akornanni mittarfissap pilersinneqarnissaa pilersaarusiussavaa. Aamma Tasiilami mittarfissaq Ilulissallu mittarfiata tallilerneqarnissaa.
Taakkua saniatigut Nuummi mittarfissualiornissamut pilersaarutit ingerlatiinnarneqassapput.
Atuaruk: Qaqortumi mittarfiliortoqarnissaa Demokraatinit suli tapersersorneqarpoq, kisianni...
Ujaraaqqanik qallikkanik mittarfiliornissamut misissuinissat
Naalakkersuisuutitaqalersussat nutaat, qulingiluanik ilaasortaqartussat, Siumut Naalakkersuisuni tallimanik ilaasortaatitaqalissaaq, Atassut aamma Demokraatit tamarmik marlunnik ilaasortaatitaqalissasut, aamma Qeqertarsuarmi, Qasigiannguani, Kangaatsiami Nanortalimmi ujaraaqqanik qallikkanik mittarfiliornissamut periarfissat misissoqqissaarniarpaat.
- Ujaraaqqanik qallikkanik mittarfiliornissamut periarfissat misissoqqissaarneqassapput inuussutissarsiornikkut siuarsaanermut aammalu suliffissaqartitsiniarnermut aningaasaliissutit kiisalu suliffissaaleqisut sulilersinneqarnerisigut pilersinneqarsinnaasunngorlugit, Naalakkersuisooqatigiinniarluni isumaqatigiissummi ilaatigut taama allassimasoqarpoq.
Aamma Kangerlussuup Narsarsuullu siunissaat kommuuninut Naalakkersuisunngortussat paaseqatigiissutiginiarniarpaat.