Qaninnerusumik suleqateqarnissaq Kommuni Kujallermit kissaatigineqartoq
Kujataani nunalerinermik inuussutissarsiuteqarnerup ilungersunartumik inissisimanera aaqqiiviginiarlugu Naalakkersuisut iliuuseqartariaqartut, Kommuni Kujallermi borgmesteri Stine Egede oqarpoq.
Nunalerineq pillugu periusissiaq 2021-miit 2030-mut atuuttoq naapertorlugu, Kalaallit Nunaani inuussutissalerinerup nunalerinerullu iluani imminut pilersorsinnaanerup annertunerulernissaa, Naalakkersuisut kissaatigaat. Nunalerinermik inuussutissarsiuteqarneq ullumikkut ilungersunartumik inissisimasoq tapiissutinillu pisariaqartitsisoq naalakkersuisut erseqqissaatigaat.
Aviisi Sermitsiaq allappoq.
Taamaakkaluartorli nunalerineq pillugu periusissiami siunissaq ungasinnerusoq eqqarsaatigalugu anguniagassatut siunniussat toqqammavigalugit, nunalerinermi annertunerusumik tunisassiorsinnaaneq aningaasarsiorsinnaanerlugu aqqutissiuunneqassasut naalakkersuisut anguniarpaat.
Nunalerinerullu maannakkut ilungersunartumik inissisimasup ilorraap tungaanut aallartinneqarnissaa anguniarlugu naalakkersuisut periusissiamik ersarissumik manna tikillugu suliaqarsimanngitsut, Kommuni Kujallermi borgmesteri Stine Egede, Inuit Ataqatigiit, isumaqarpoq.
Nunalerinerlu pillugu Kommuni Kujalleq naalakkersuisulli maannakkornit suli pitsaanerusumik qaninnerusumillu suleqatigiittariaqartut, borgmesteri isumaqarpoq.
Oqaluttuaq tamaat aviisimi Sermitsiami sapaatip-akunnerani matumani saqqummersumi atuaruk, akiliillutit ugguuna iserfigisinnaavat:
