Qanigisat akiuussutissamik kapitissimasut angerlarsimaannaqqusaasarunnaarput
Tamakkiisumik akiuussusersimasut tunillatsissimasumut qanigisaagaluarunilluunniit tunillatsissimanermut ersiuteqanngikkunik angerlarsimaannarnissamik piumasaqarfigineqarunnaarput.
Tunillatsissimasumut qanigisaaguit, kisiannili tamakkiisumik akiuussuserneqarsimaguit, taava angerlarsimaannarnissamut maleruaqqusat nutaat naapertorlugit, angerlarsimaannarnissamik piumasaqarfigineqarunnaarputit.
Nunatta nakorsaaneqarfia tusagassiorfinnut taama nalunaaruteqarpoq.
- Tassa imaappoq qanigisaasuuguit akiuussutissamillu marloriarlutit kapitereersimaguit nappaammillu malunnaateqarnak angerlarsimaannaqqusaajunnaassasutit. Suliartorsinnaavutit atuariartorsinnaallutilluunniit, taamaattoq nappaalanissamut malunniuteqariataarnissat eqqumaffigissavat, tunillatsissimasumillu qanillisaqarsimaguit ullut sisamassaat arfineq aappassaalluunniit qaangiuppat misissortittassaatit, nunatta nakorsaaneqarfia ilisimatitsivoq.
Angerlarsimaannaqqusaasarnermut malittarisassat nutaat ilisimatuussutsikkut paasisanik tunngaveqarput. Tassa tamakkiisumik akiuussusertissimasut tunillatsissimagaluarunilluunniit coronavirusimik tunillatsissimanermut ersiuteqanngikkunik tunillaasarnerat qaqutigoorluinnartoq paasineqarsimammat.
Qanigisaasut akiuussuserneqarsimanngitsut ataasiaannarluunniit kapitissimasut suli angerlarsimaannarnissamik piumasaqarfigineqarput ullullu arfineq-aappassaanni misissortittassallutik.
Qanigisaasut tassaapput:
- Tunillatsissimasup tunillaasinnaasutut naatsorsuunneqarnerata nalaani tunillatsissimasumik illoqateqarsimaguit
- Tunillatsissimasoq timaatigut attorsimagukku, soorlu eqitaarnikkut/kunissuunnikkut iml. quersortoqarsimappat/tangajortoqarsimappat
- Inuk tunillatsissimasoq meterimik ataatsimik minutsit 15 sinnerlugit qanissimagukku, soorlu oqaloqatigalugu ataatsimeeqatigaluguluunniit
Ersiuteqartut angerlarsimaannartassapput
Tamakkiisumik akiuussuserneqarsimasut angerlarsimaannarnissamik piumasaqarfigineqarunnaaraluartut, taamaattoq tunillatsissimanermut ersiuteqalerunik suli angerlarsimaannartassasut, nunatta nakorsaaneqarfiata ilisimatitsissutigaa.
- Covid-19-ip malunniutaannik malunnaateqalersimaguit, taava angerlarsimaannaqqusaassaatit misissortissaatillu. Tamanna atuuppoq aamma akiussutissamik tamakkiisumik kapineqarsimagaluaruilluunniit, akiuussutissamik kapitinneqarsimanngikkuit iml. qaammatit kingulliit pingasut iluanni tunillatsissimaguit.
- Tamanna isumaqarpoq taamaallaat angerlarsimaannaqqusaassasutit Covid-19-ip malunnaataannik malunnaateqalersimaguit, qanigisaasuuguit, iml. tunillatsissimasumik illoqateqaruit inoqutigiit akornanni kisimiititaasinnaanngitsumik, nakorsaaneqarfik allappoq.
Immikkut pisoqarsinnaasarpoq allatut ittumik – taamaattoqarsimatillugu Nakorsaaneqarfiup naliliinerani taamaattuni atuutissaaq.