Qangarnitsat nalunaarsorneqartut

Narsap Katersugaasivia sumiiffimmi qangarnisarpassuarnik, ilaatigut Nuukullammi Narsallu Iluani nalunaarsuilluni aallartissimavoq.

- Qangarnitsat sumiinnerannik nalunaarsuiniarnermi siunertaavoq, qangarnitsat sumiissusersineqarnissaat Nunattalu Katersugaasiviata paasissutissanik toqqorteriviani allassimasuutigineqalernissaat. Narsap eqqaani qangarnitsanik ilisimaneqanngitsunik ulikkaarpoq, ilaatigut qallunaatsiaat aamma inuiaat thulemeersut atugarisimasaannik. Qangarnitsat taakku qanoq innerisa nalunaarsorneqarnissaat pingaaruteqarpoq, silammi pissusaata allanngoriartornerata qangarnitsanut sunniuteqartarnera ilisimaneqalersimammat, katersugaasivimmit tusagassiorfinnut nalunaaruteqarnermi ilisimatitsissutigineqarpoq.

Assit gps-ikkullu sumiissusersiuineq

Suliaqarnermi inuit ilivitoqaat immikkut ukkatarineqarput, Narsammi eqqaani ilivitoqarpassuaqarmat. Katersugaasiviup qanarnitsat assiliortorpai gps-ilu atorlugu sumiissusersisarlugit.

Paasissutissat katersorneqartut Nuummi Nunatta Katersugaasiviani itsarnisarsiuunut nassiunneqassapput.

- Sumiiffimmi qangarnitsat tamarmik suli nalunaarsoneqarsimanngillat, tamannalu iliuuseqarfiginiarsarivarput. Suliaqarnerup tamatuma sumiiffiup oqaluttuassartaa pissanganartoq erseqqinnerusumik takutissavaa. Qangarnitsallu ilaat siunissami itsarnisarsiuunit siunissami misissuiffigineqarsinnaanerat periarfissaavoq, Narsap Katersugaasiviani pisortaq oqaluttuarisaanermillu ilisimasalik Jesper Stormly Enevoldsen oqarpoq.