Qangaanerusoq pissutsit: Pinngitsaaliinermut 50 koruuninik akiligassinneqartut
Suliani ukiukitsut pinngitsaalineqarfigisaanni pineqaatissiissutit marloriaatinngortinneqarnissaat ilimanaateqalerpoq. Qangaanerusoq Kalaallit Nunaanni pineqaatissiinerit pinerlineqartunut ilaatigooriarlutik mitalliinertut isikkoqartarsimapput.
Pineqaatissiissutit sakkukippallaarput. Inatsisartuni politikerinit pingaartumik pinngitsaaliillutik atoqateqarsimasunut ullumikkut pineqaatissiissutaasartut pillugit sapaatip-akunnerini arlalinni taama oqartoqartarsimavoq. Kisianni qangaanerusoq pineqaatississutit ilaatigooriarlutik tupinnaannartumik sakkukissinnaasarsimapput.
Aviisi AG taama allappoq.
Pingaartumik 1954-imi pineqaatissiissut, angutit inuusuttut pingasut niviarsiaqqamut inuusuttuaqqamut pinngitsaaliillutik arneriniarfiginnissimasutut unnerluutigineqarfigisimasaat, taamani oqallisigineqarsimavoq. Suliaq Atuagagdliutini eqqartuussisuunerup Jørgen Kisbye Møllerip allaaserisaani sukumiisumik oqaluttuarineqarpoq.
Taassuma allaaserisami oqaluttuaraa, nukappissat inuusuttut marluk 1951-imi ukiakkut unnukkut taarsereersoq niviarsiaraq inuusuttuaraq ussiataarlugu umiarsualiviup tungaanut pisuttuaqataatissimagaat. Sivitsunngitsoq nukappissat pingajuat takkussimavoq.
- Niviarsiaqqap nukappissat taakkua pingasut isumapiloqarsoralugit annilaangalerluni ingerlaqatigeqqikkumajunnaarpai. Taamaalimmat nukappissat niviarsiaraq taliisigut tiguaat pinaasersorlu nusukarlugu ingerlatilerlugu. Nusukattarlugu paassaasiviup tunuanut ingerlappaat tassanilu pinngitsaalilllugu kinguleriiaarlutik angutaaserfigaat imaluunniit angutaaserniarfigalugu nikittaallutik talii niuilu najummisarlugit. Taama amiilaarnartumik iliorfigineqarnermini niviarsiaraq nilliavoq ikiortissaminik suaartarluni, nukappissali qanoq ilioriarsinnaanagit, landsdommeri suliaq pillugu allappoq.
Piumasaqaat eqqumiitsoq
Niviarsiaqqap tamatuma kingorna saassussineq politiinut nalunaarutigaa, nukappissallu killisiorneqarnerminni pisuusutut akuersipput.
- Pinngitsaaliinermut pinngitsaaliiniarnermullu pisuusutut nassuerput, landsdommeri allappoq tamatumalu kingorna eqqartuussut, Kalaallit Nunaanni Danmarkimilu eqqartorneqalersoq, issuaavigalugu:
- Unnerluutigisat pingasut tamarmik eqqartuussisunut pisuunerminnik nalunaarmata kredsrettip eqqartuuppai tamaasa 50 koruuninik akiliisussanngorlugit ilisimatillugillu inuiaqatigiit taama pinerluttuliorneq piumanngilluinnaraat.
Aviisimi AG-mi atuarnerusinnaavutit. Aviisi uani pissarsiariuk:
