Qamuteralalluni annaasseriaasoq nersorneqartoq
Qamuteralalluni sikukkut nakkartoqarnerani martsimi 2022-mi annaasseriaasoq Kalaallit Nunaata Politiivinit nersorniarneqarpoq. Annaassiniaasoq misiliigaluarnermini sikukkut aamma nammineq nakkarpoq, kingornali annanneqarluni.
Jaqqa Grønvold martsimi 2022-mi annaasseriaanini pillugu Kalaallit Nunaata Politiivinit nersornaaserneqarpoq. Tamanna pivoq tallimanngornermi 12. maj.
Jaqqa Grønvold Nuummi Kangerluarsunnguami qamuteralammik aquttoq sikukkut nakkarmat, qamuteralannik aquttup Jaqqa Grønvoldip nangaarianngivilluni angut annaanniarpaa.
- Ajornartorsiortorli annaanniarlugu Jaqqa nammineq qamuteralaalu sikukkuttaaq nakkarput, namminerlu inuunini annaanniartariaqalerpaa, pisoq pillugu Kalaallit Nunaata Politiivi allapput.
Annaanneqartoq
Jaqqa Grønvold Air Greenlandip, qamuteralannik aquttut nammineq ikiuuttut, angallatip alapernaarsuutip Einar Mikkelsenip, Peqqinnissaqarfiup politiillu ikioqatigiillutik annaassiniarnerisigut annanneqarpoq. Qamuteralalluni sikukkut nakkartoq siulleq pisumi ajunaarpoq.
- Redningsmedailleselskabep aalajangersimavaa Jaqqa Grønvoldip annaassiniarnermini nammineq inuunini peqqissutsinilu navianartorsiortillugit immikkut illuinnartumik sapiissuseqarluni iliuuseqarsimanera pillugu nersorniarlugu, politiit allapput.
Redningsmedailleselskabet sinnerlugu politiit nersornaasiipput.