Skip to main content

Qamittoortoqareersorlu: Takussavarput qanoq pitsaanerusumik iliorsinnaanerluta

Illoqarfiit pingaarnersaanni erngup nukissiorfianit innaallagissiortoqaqqilereermat nuna tamakkerlugu attaveqaatit qajannarunnaarput. Ajornartoortoqaqqinnginnissaa pillugu Tusass isumassarsiortussanngorpoq.

Nuup eqqaani Utoqqarmiut Kangerluarsunnguanit innaallagissiorfimmut attaviit aaqqinneqarmata Nuummi nunallu sinnerani oqarasuaatit internetimullu attaviit iluarsipput.

Nuummili unnuaq naallugu qamittooqqasoqareersorlu, nunatsinni innuttaasut marlunngornermi ullaakkut sianersinnaanatillu internetimut attaveerutsinneqarput.

Tusass akunnerpaalunni qamittooqqanissamut sillimasimammat oqarasuaatit attavii internetillu attavii qamittoornermit akunnerpaaluit qaangiummata aatsaat kipisoorput.

Tusassilli oqarasuaatit angallattakkanut attavilersuutai batteereeruttoorput, taamaasillunilu attaveeruttoqarluni.

- Pinartoqartillugu pilersuisinnaareerpugut, taakkulu sumiiffinni assigiinngitsuni inissisimapput. Ajornartoornerli taama annertutigitillugu pinartoqartillugu aaqqiissutissatut sillimmatigisarput naammassimanngilaq. Soorunami taama imaannaanngitsigisumik pisoqareertillugu immitsinnut qiviartariaqarpugut qanorlu ilinniarfigisinnaanerlugu takullugu, Tusassimi pisortaaneq Kristian Reinert Davidsen oqarpoq.

Eqqarsaatersuuteqartussanngortoq

Kristian Reinert Davidsenip oqaatigaa pissutsit naliginnaasunngoqqimmata Tusassimi eqqarsaateqartoqartussanngortoq. Siunissami qamittoornerni sivisunerusuni nuna tamakkerlugu oqarasuaatit internetillu attaveqartiinnarsinnaanissaanut suliffeqarfik isumassarsiorniartussanngorpoq.

- Ajornartoortoqartillugu atuisutta pitsaanerpaamik sullinneqarsinnaanerannut ujartuissaagut. Minnerpaarpaamik sullissinerup qanoq ittuunissaa paasiniassavarput, pisortaaneq oqarpoq.

Qamittoortoqareerneranit akunnerpassuit qaangiummata oqarasuaatit internetilu aatsaat attavinipput. Tamassumunnga pissutaavoq datacenterit kissattoorsimammata, attavinissagunillu aaqqissuunneqaqqaartariaqalersimammata. Pisortaaneq oqaluttuarpoq attaviit aaqqinnissaata tungaanut sulisut unnuaarullutik sulisimasut.

Generatorit orsussatortut eqqarsaatigineqarput

Nuummi sanaartortut arlallit generatoriminnik, sarfalersuummik, benzinatortunik suliffeqarfinnut arlalinnut atukkiussipput. Soorlu nerisassaarniarfinnut, aammali Tusassimut.

Attaveqaatit kipisooqqinnginnissaannut sarfalersuutinik benzinatortunik pissarsiniarnissaq Tusassip isumaliutersuutigissavaa. Sarfalersuutit innaallagiaaruttoornermi attavinnut atortut, sitesit datacentereqartut, attaveqartitsiinnarnissaanut sarfalersuillutik qulakkeerissapput.

- Nassuerutigisariaqarparput ajornartoorneq taama annertutigisoq misigereertillugu, siunissami pinngitsoortinniarutsigu taava annertusaasariaqarpugut. Sarfalersuutinik amerlanerusunik peqarsinnaakutsoorpugut, datacenterit pisariaqarnerpaat ingerlatiinnarnissaat qulakkeerniarlugit, Kristian Reinert Davidsen oqarpoq.

Tamanna qanoq akeqassanersoq suli oqaatigisinnaanngilaa.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER