Qeqertaasami nunami ikuallanneq arriippallaamik qamiisaaniarneq ingerlanneqartoq, Kommune Qeqertalimmi Ikaarsaarianermut Ataatsimiititaliaq naliliivoq.

- Qeqertaasami ikuallannermut paamaarussisoqarpoq iliuuseqarnissamulli aallaqqaataaniillu pimoorussisoqarani, Ane Hansen Ikaarsaariarnermut Ataatsimiititaliaq sinnerlugu, Qaasuitsup Kommuniani borgmester Ole Dorphimut allakkani ammasuni isornartorsiulluni allappoq.

Maanna qeqertaasami nunap ikuallannera aallartimmat ullut qulit sinnerpai. Taamaammat nunami ikuallannerup siaruaaterujussualissangaluarpat qamisarniarnissaata ajornarsinissaa, Ikaarsaariarnermut Ataatsimiititaliap ernumassutigaa.

Assit takukkit: Piniartarfimmi nuna ikuallattoq

Pinngortitami ajunaarnersuanngorsinnaasoq

- Upalungaarsimanermut Ataatsimiititaliaq tamakkiisoq tunuliaqutaralugu tamakkiisumik piaartumillu nalersuisoqassasoq ilumut kommunip atortorissaarutai illoqarfimmi nunaqarfinnilu sulinissamut taamaallaat tulluussagaasut ikuallannermermut taamak annertutigisumut qamisaatigissallugit tulluarnersut, pisariaqassappallu avataaniit ikiortissarsiorluni qamisaasoqarnissaa aallartikkasuarneqassasoq piumasaraarput, Ikaarsaariarnermut Ataatsimiititaliaq erseqqissaavoq.

Taassuma saniatigut nunami ikuallanneq pinngortitami ajunaarnersuanngorsinnaasoq ernumassutigaat.

- Massakkut ikuallanneq sukkasuumik annertusiartortoq unitsinniarneqanngikkuni sivisoorujussuarmik ikumanissaa ilimagineqarpoq. Tuttoqassutsimut uumasoqassutsimullu sunniuteqarnerlukkumaartoq Pinngortitaleriffimmit oqaatigineqareerpoq.

- Piumasaraarput Ole Dorphi paasissutissiisariaqartoq, qamisaanissamulli kommuni qanoq pilersaaruteqarnersoq nassuiaaqqullugu, Kommune Qeqertalimmi Ikaarsaariarnermut Ataatsimiititaliaq oqarpoq.

Atuaruk: Nunami ikuallannerit naliginnaanngitsumik amerlapput