Qallunaatsiaat pillugit VR-kkut takutitassiaq Danmarkimi takuteqqaarneqassasoq
Vikingit Kalaallit Nunaannut tikinnerat pillugu virtual reality aamma podcast atorlugit takutitassiaq Nordatlantens Husimi juunip qaammataani saqqummiunneqassaaq.
”The Lost Norsemen” (Qallunaatsiaat tammarsimasut) pillugit Nordatlantisk Husimi saqqummersitsineq sisamanngornermi juunip 17-ani ammarneqassaaq, saqqummersitassaq Norse Them Parksimit vikinginut atatillugu misigisassarsiortitsinermi ilisimaslimmit suliaavoq.
Saqqummersitassaq siorna novembarip qaammataani Nuummi kulturikkut illorsuarmi Katuami saqqummersinneqarsimavoq.
Isarussat Virtual Reality, pinnguarneq, angalasimanermit oqaluttuat, podcast nipillu immiussat atorlugit takuniaasut qallunaatsiaat - aamma Kalaallit Nunaanni vikingisut, Islandimiit Kalaallit Nunaannukarsimasutut ilisimaneqartut takuniaasunit tumisiorneqarsinnaapput.
Eriagisassanngortinneqarsimaneranut tunngaviusoq
Saqqummersitsinikkut Kalaallit Nunaata oqaluttuassartaani ilisimaneqarpianngitsoq ilisaritinneqassaaq, tassalu vikinginit kulturikkut kingornussat asseqanngitsut, ilaatigut Kujataani nunaminertarujussuit UNESCO-mit eriagisassanngortinneqarsimasunit tunngaveqartut.
Peter Franklin Würtz Norse Theme Parksimik tunngaviliisuusimasoq isumaqarpoq, ”The Lost Norsemen”-ip Danarkimi Nordatlantisk Husimi takuteqqaarneqarnissaa naapertuuttoq:
- Nordatlantisk Hus saqqummersitassap Danmarkimi takuteqqaarneqarnissaanut naapertuulluinnarpoq. Illu inunnut Atlantikup Avannaaneersunit soqutiginnittunillu, taakkununnga ilanngullugit Kalaallit Nunaanneersunit kulturikkut katersuuffiusarpoq, Danmarkillu qeqqarpaani - Fynimiittumi Odensemi inissisimalluni, Peter Franklin Würtz oqarpoq.
Saqqummersitsinermi issarussat virtual reality-usut 360 gradimik takusaqartitsisinnaasut qitiusussaapput, taakku atorlugit Nuup Kujataatalu eqqaanni kangerlunni, qooqquni sineriammilu oqaluffiusimasut, iliveqarfitoqqat, sermit iigartartut qallunaatsiaallu naasorissaasuisa illui ulapiffiusarsimaqisut misigisarssarfiorfigineqarsinnaapput.
”The Lost Norsemen” sisamanngornermi juunip 17-ani Odensemiittumi Nordatlantisk Husimi takuniarneqarsinnaanngussaaq, septembarillu pingajuata tungaanut takuniarneqarsinnaassalluni.