Skip to main content

Qallunaatsiaanik aassunnitsumik akiuunneq pillugu oqaluttuaq kusanartoq

Isiginnaagassiaq 'Nalusuunerup taarnerani' isiginnaartitsinikkut, qitinnikkut aamma erinarsornikkut qallunaatsiat nungunneqarnerannik oqaluttuartoq nersualaarneqarpoq.

Oqaluttuaq aattaqaqisoq aamma alianartoq, qallunaatsiat nungunneqarnerannut tunngasoq kusanartumik oqaluttuarineqarsinnaava?

Aap, tamanna AG-p aamma Sermitsiap naliliinerat ersarippoq.

- Immikkuullarilluni alutornarpoq, Jette Andersen AG-mi allappoq.

- Eqqumiitsuliornikkut suliniut anguniagaqarluarfiusoq, balletimi qitittaatsinik ilusilersuineq takorannersoq, isiginnaartitsisartunit, qitittartunit erinarsortartunillu piginnaaneqarluartunit takutinneqartoq, scenemi sakkortusaartorujussuullutik timimikkullu eqaalluinnarlutik isikkumikkullu mersernarpalullutik takutippaat, Dorthe Olsen Sermitsiami naliliivoq.

Atuaruk: Kulturip illorsuani nuannanneq - videokkut inuulluaqqusinerit takukkit

Isiginnaagassiaq Villads Villadsenip Qasapip ullui kingulliit pillugit taalliaanik tunngaveqarpoq. Qasapip qallunaatsiaat malersorpai, taakku nunaqarfimmiittut tamaasa ataaseq kisiat pinnagu toqussinnarlugit qimaasimapput.

- Oqaluttuat tulluusimaarnermut tunnganngillat, kisianni nammineq aniguiniarluni allatut ajornartumik nakuusertariaqarneq pillugu aliasunnermut tunngavoq. ”Nalusuunerup taarnerani”-mi Inuit tarnigisa isserat aamma qanga, maanna siunissamilu pisut pisussallu pillugit takorluuinerit eqquipput.

Naliliisut isiginnaagassiap takusassartai ersarissut isiginnaartitsisullu takutitsinerat maluginiarpaat.

- Ingammik Miké Fencker Thomsen isiginnaartitsinermut piginnaaneqarluarnini malugitippaa, tassani scene tamaat tiguaannanngilaa aammali sinaanukartarpoq kamanninilu, sakkortusaarnini nukissaqarninilu isiginnaartunut tutsittarlugu, Dorthe Olsen allappoq.

Alexander Mongommery-Andersen aamma nersualaarneqarluarpoq.

- Aalanermini isiginnaartut misikkarissutsiminik, qajannassutsiminik eqaalluinnarlunilu angutit marluusut akornanni aassunnitsumik akiuunneq oqaluttuarisinnaavaa, tassanilu allanit attorneqarani natermi miloriussaasaqattaarpoq, Dorthe Olsen allappoq.

Atuaruk: Nukâka isiginnaartitseqaannginnermini: "Nuannaarpunga tulluusimaarlugalu"

Jette Andersenip Miké Fencker Thomsen aamma Alexander Montgomery-Andersen pikkugivai, kisianni nipilersuut maluginiarsimavaa.

- Erinagissorsuit ataatsimut inissitsiterneqarsimapput. Isiginnaartitsinermi ila qasseriarlunga qiiaammernerlunga oqaatigisinnaanngilara. Karina Møllerip aamma Nukâka Coster-Waldausip erinaat kialluunniit tusarnaartariaqarpaat, taanna AG-mi allappoq.

Isiginnaagassiap Katuami takutinneqarnerata kingorna Upernavimmut ullumikkut ingerlaqqissapput. Februaarip 25-anni Ilulissanut pissapput, marsip aallaqqaataani Aasiannut aamma marsip sisamaanani Sisimiunut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER