Naalagaaffeqatigiinnermi siuttut pingasut, Lars Løkke Rasmussen (V), ministeriuneq, Kim Kielsen (S), Naalakkersuisut siulittaasuat, Aksel V. Johannesen (J), lagmand, marlunngornermi Ilulissani 11. april ataatsimiipput.

Nunani Avannarlerni Ministerit Siunnersuisoqatigiivini qallunaat siulittaasuutitaqarnissaanni Savalimmiut sunniuteqarnissaa ataatsimiinnermi oqaluuserineqarpoq. Savalimmiut mingutsitsinngitsumik nukissiornermut suliniummut akisussaasuussaaq ”Takorluukkamit piviusumut – siunissami qeqertani inuiaqatigiit nukissiuutissaat”, taanna qallunaat siulittaasuutitaqarnerannit tunngaviusut pingasut ilagaat.

Savalimmiuni naalakkersuisut aamma politikkikkut siuttut suleqatigiinnermut MR-FJLS-imut ilanngunnissaa sulissutigaat. Suleqatigiissutaasumi nunat avannarliit aalisarnermut, nunalerinermut, inuussutissaqarnermut orpippassuarnillu atuinermut tunngasut pingaarnerit oqaatigineqarput.

- Qallunaat siulittaasuutitaqarneranni sunniuteqaqataanissarput pingaarutilerujussuuvoq. Uagut inuiaqatigiit pilluta pitsaasumik paasisaqarfigineqarlutalu takuneqassaagut, tassani nunani avannarlerni suleqatigiinnermi suliaqatigut eqimattat Savalimmiut, kulturerput aamma inuiaqatigiit misigineqassapput, Aksel V. Johannesen oqarpoq.

- Nunani avannarlerni peqataanermut pitsaanerulersillugulu nukittorsassavaa, lagmandi nangilluni oqarpoq.

Danmarkip Kalaallit Nunaat aamma Savalimmiut avitseqatigai

Qallunaat Nunani Avannarlerni Ministerit Siunnersuisoqatigiivini siulittaasuutitaqarnerat Danmarkip, Savalimmiut aamma Kalaallit Nunaata akornanni avinneqassaaq. Siulittaasuutitaqarnermi pingaarnertut  ”Siunissami aaqqiissutissat” qulequtarineqarpoq, lagmandip Thorshavnimi allattoqarfia ilisimatitsivoq.

Siulittaasuutitaqarnermi suliniummut tunngasumik 45 millionit koruunit ilaapput. Savalimmiut, Kalaallit Nunaat aamma Danmark immikkut suliniuteqassapput, taakku meeqqat tamat oqartussaanerannut tunngasuni peqataatinneqarnerannut, qeqertami inuiaqatigiinni mingutsitsinngitsumik nukissiornermut  aamma nunani avannarlerni sinerialimmi kulturimut.

Tamatuma saniatigut Savalimmiut nunanit avannarlernit ataatsimiinnernut 15-20-nut qaaqqusisuussaaq.