Qallunaat raajarniartartui qoqassipput Kalaallit Nunaat iluarisimaarinnittoq

Kalaallit Nunaata EU-llu aalisarnermik nutaamik isumaqatigiissutaatigut Kalaallit Nunaat EU-mit millionilinnik manna tikillugu taama amerlatigisunik immikkut pissarsivoq. Bornholmimi raajarniarnermik ingerlatsivissuup pisortaanerata isumaqatigiinniarnerit inernerat pakatsissutigaa.

- Isumaqatigiinniarnerit inernera pakatsissutigaarput. Kitaani 4.000 tonsinik raajartassinneqarusussimagaluarpugut, taamaallaalli 2.600 tonsiinnarnik pisassinneqarpugut, Kristian Barslund Jensen, umiarsuaatileqatigiiffimmit Ocean Prawnsimeersoq oqarpoq, taannalu umiarsuarmik tunisassiorfiuutigisumik Ocean Tigerimik ukiorpassuarni Kalaallit Nunaata eqqaani aalisartarsimavoq.

Kalaallit Nunaata EU-llu isumaqatigiinniartitaasa siuttuisa Emanuel Rosingip Céline Idil-illu kingullermik tallimanngormat aalisarnermik isumaqatigiissut nutaaq, ilaatigut pissanganartorsiorfiusarsimasoq, naammassimmassuk taamatut pisoqartillugu pisarnertut champagne-mik skåleertoqanngilaq.

Aviisi Sermitsiaq taama allappoq.

Piffissami 2021-imiit 2026-imut aalisarnermik peqatigiinnissamik isumaqatigiissummik, piffissamilu 2021-imiit 2024-imut aalisarnermi protokol-imik isumaqatigiinniarnerit qaqutigoortorujussuarmik ingerlasimapput.

- Corona pissutaalluni, Emanuel Rosing naatsumik nassuiaateqassaguni taamatut oqarpoq.

Corona pissutigalugu isumaqatigiinniarnerit teknikkikkullu ataatsimiinnerit 2020-imi marsip aallartinneraniilli ajornakusoortinneqarsimapput ilaatigut pissutigalugu tamakkua nettimi Skype-kut Teams-ikkullu ingerlananeqartarsimammata, taanna nangilluni oqaluttuarpoq.’

Taamaasilluni isumaqatigiinniarnermi siuttut taakkua marluk isumaqatigiinniartuilu aalisarnermik isumaqatigiissut isumaqatigiinniutigalugu ilaatigut Bruxellesimi naapittarsinnaasimanngillat. Kalaallit Nunaata EU-llu isumaqatigiinniartui tamatigut taamaasiortarsimagaluarput, Kalaallit Nunaat 1985-imi EU-mik peqatigiinnissamik isumaqatigiissuteqartalermalli, ukioq taanna februaarip aallaqqaataani Kalaallit Nunaat taamanikkut EF-imit animmalli.

Aalisarnermilli isumaqatigiissut nutaaq, ukioq ataaseq ajornakusoortumik sakkortuumillu isumaqatigiinniareernerup kingorna tallimanngormat januaarip 8-anni isumaqatigiissutigineqartoq, Kalaallit Nunaannut pitsaalluartutut isikkoqarpoq.

Bornholmerit qoqassipput

Qallunaat umiarsuaatileqatigiiffiat taanna EU-mi umiarsuaatileqatigiiffinnit annaasaqarnersaavoq. Ocean Tigerip pisassai annertuumik ikilisinneqarput, selskabip 4.000 tonsinik raajartassinneqarnissani piumasarisimagaluaramiuk.

Raajarniarnermik ingerlatsivissuup umiarsuaatileqatigiiffiullu Ocean Prawnsip pisortaanerata piginneqataasullu Kristian Barslund Jensenip, kilisaammik Ocean Tigerimik aalajangiisuusumik sunniutillip piginnittuunerullu, isumaqatigiinniarnerit inernerat pakatsissutigaa. Tamanna bornholmimiunut qoqassinarpoq.

- Tamanna tupinnanngilaq, tassami pisassat tamarmiusut, TAC, qaffasissuupput Kalaallit Nunaatalu tamaasa aalisarsinnaanngilai. 2020-ip aallartinnerani EU-p Kalaallit Nunaannik isumaqatigiinniuteqalernerani piumasarisimavarput Kitaani 4.000 tonsinik raajartassinneqarnissarput. EU-p siunnersuutai 3.500 tonsiupput, taakkulu kigaatsumik ikilisikkiartuaartinneqarsimapput 2.600 tonsinut, siorna uagutsinnut pisassaritinneqartut amerlaqataannut, Kristian Barslund Jensen oqarpoq.

Aviisimi Sermitsiami allaaserisaq tamakkerlugu atuarsinnaavat:

Powered by Labrador CMS