Reguleringer
Qallunaat politikerii puisinik toqoraatitsiniarput
Qallunaat aalisartui puisinit akornusersorneqarput. Politikkimi amerlanerussuteqartut puisit ikilisarnissaat taperserpaat, tamakkua nunanit tamalaanit illersorneqaraluartut
Christiansborgimi politikerit amerlanerussuteqartut qallunaat imartaanni puisinik ikilisaanialerput, taamatut allappoq Politiken sapaammi.
Taamaasiorniarput qallunaat aalisartui ikiorniarlugit, tamakku qaammatini arlalinni maalaarutigisimammassuk pisamik puisinit nerineqartarnerat. Venstre-t, Socialdemokratit aamma Radikale Venstre-t oqaaseqartartui isumaqarput puisit amerlassusaat killilersimaartinneqassasoq, tamakkua ukiuni kingullerni Østersømi Nordsømilu amerleriarujussuarsimammata.
Puisit grå- aamma spættetsæl-it saarullittortorujussuupput. Tamatuma saniatigut qassutit neriniarfigalugit aserortertarpaat.
Aamma atuaruk: Video: Puisinut bussimi erinarsoqatigiinneq
Aamma atuaruk: Video: Inuit Sila-p paasisitsiniutaa takujuk
Aamma atuaruk: Puisit pillugit Københavnimi akerliussitsimik takutitsineq
– Nungusaataanngitsumik amerlassuseqassapput, taamaasilluni puisinut aalisartunullu inissaqassalluni, Venstre-t aalisarnermut oqaaseqartartuat Thomas Danielsen Politiken-imut oqarpoq.
Radikale Venstre-ni Socialdemokratinilu oqaaseqartartut assigalugit nassuerutigaa tamanna mianernartuusoq, tassa puisit pinngortitamik illersuinermi immikkut inissisimammata.
– Uagut inuit ilaanneeriarluta naakkiginnippallaartarunarpugut puisit inequnaqimmata. Aamanganiatut ingajapput - inequnaqaat amerlavallaalernissartik kimmaalernertillu tikillugu, Lone Loklindt (R), aamma Avatangiisinut ataatsimiititaliami siulittaasuusoq, oqarpoq.
– Piviusorsiorpalaarnerussaagut paasiniarlugulu tamanut suna pitsaanerpaajunersoq, inunnut pinngortitamullu. Pinngortitap ajoqutiginavianngilaa pisuussutaanik atuinerput, taanna oqarpoq.
Taamatuttaaq isumaqarpoq Socialdemokratit aalisarnermut oqaaseqartartuat Bjarne Laustsen.
Avatangiisinut ministeri Ida Auken (SF) mianersortumik ilaliivoq, mianersoqqussutigaluguli suliniutit akuersissutigiuminaatsinneqassasut nunanut aalisarnermut inussiarnerpallaanngitsunut.
– Nassuerutigaara aalisartut sineriatta ilaanni puisit qassutiminni ajornartorsiutigimmatigit. Nuannernavianngilaq atortut aserortersimasut qaqissallugit. Puisilli pineqartut nunanit tamalaanit illersorneqarput, imaasiallaannarlu piniarnissaannut akuersissuteqarsinnaanngilanga, taanna Politiken-imut oqarpoq.
Kalaallit puisinniarnerisa tusaamaneqarneranut iluaqutaassava qallunaat politikeriisa Danmarkimi puisit ikilisarnialermatigit? Qanoq isumaqarpit?