Qallunaat-kalaallit suliffeqarfiutaasa neqerooruteqartitsinermi atortussat utaqqimaarpaat
Pituffimmi suleqatigiinnermi politikikkut killiliussat inissinneqareerput. Suliffeqarfiit pingasut 2014-imi neqerooruteqaraluartut Excelis Servicesimulli ajorsartut, neqerooruteqarnermi atortussat pissangallutik utaqqivaat, taakkumi misissorluarneqassammata
Copenhagen Arctic, Per Aarsleff A/S aamma Greenland Contractors taakku tamarmik Pituffimmi kiffartuussinissamut isumaqatigiissutissamut 2014-imi neqerooruteqaraluarput, kiffartuussinissamulli isumaqatigiissut piginneqatigiiffimmut aningaasaqanngitsumut Exelis Servicesimut isumagisassanngortinneqarpoq, tassanngaanniillu Amerikamiut suliffeqarfiutaannut Vectrusimut ingerlateqqinneqarluni, taassumalu sakkutooqarfimmi kiffartuussineq 2017-imi oktobarip aallaqqaataanniit isumagisarilerlugu, Sermitsiaq allappoq.
Maannali USA, Nunarput aamma Danmark isumaqatigiissuteqarput, tamatumanilu siunissami qulakkeerneqassalluni kiffartuussinissamut isumaqatigiissutip kalaallinit-qallunaanit isumagineqaqqilissasoq.
Greenland Contractors ukiuni 46-ni kiffartuussinissamut isumaqatigiissummik isumaginnittuuvoq. Suliffeqarfik taanna ilaatigut MT Højgaardimit aamma Namminersorlutik Oqartussanit, Greenland Holding aqqutigalugu piginneqataaffigineqarluni. Isumaqatigiissut Nunatta karsianut iluanaarutaalluartarpoq, ingammik 2004-mit 2014-imut, tamatumanimi ukiumut aalajangersimasumik akeqartitsisoqartarmat, ukiut ingerlanerini ingerlatsinermut atatillugu pitsaanerulersinneqarsinnaasumik, taamaalilluni piginnittut MT Højgaard aamma Namminersorlutik Oqartussat iluanaaruteqarluartarlutik.
Isumaqatigiissut iluanaarnartoq
2014-iinnarmi Namminersorlutik Oqartussat Greenland Contractorsimit 91 millioninik pissarsipput, tamatumalu saniatigut ingerlatseqatigiiffiup ingerlataminit akileraarutaannit 65 millionit missaanniittut isertinneqarlutik. Ilanngullugulu sulisut ukiumut 80 millionit koruunit missaannik inuttut akileraaruteqarlutik. Ataatsimut katillugit Pituffimmit 236 millionit koruunit missaat inuiaqatigiinnut kalaallinut iluaqutissanngortinneqartarlutik.
Isumaqatigiissutip siunissami atuuttussap taama iluanaarutaatiginissaa qularutissaagunanngilaq. Greenland Contractorsimili pisortamut Peter Kofoedimut politikikkut isumaqatigiissutigineqartoq eqqortup tungaanut annikitsumik alloriarneruvoq, naak tassunga killinniarluni ukiut tallimat sulisoqarsimagaluartoq.
- Neqerooruteqarnermi atortussat soorunami utaqqimaarpavut, isumaqarlutali aalajangiinermi tunngaviit saqqummiunneqartut aallaavigalugit suliassamut neqerooruteqarsinnaassalluta. Aallartitaqarfik maanna saaffigissavarput paasiniarlugu, nutaamik sulisussarsiornissamut atatillugu qanoq piffissalersuisoqarsimanersoq paasiniarlugu. Tulliullugu neqerooruteqartitsinermi atortussat nukiit tamaasa atorlugit misissoqqissaassavavut taamaalilluta neqerooruteqarsinnaajumalluta. Nalunngilarput aamma isumaqatigissutissaq ukiunit qulinit sivikinnerussagunartoq, akeqartitsinerlu allami inissisimassasoq, soorlumi tamanna 2014-imi neqeroortitsinermi takusinnaareeripput.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: