Skip to main content

Qallunaat aalisartut puisinnianit ikiorneqarput

Danmarkimi puisi nungoratarnissaanut ernumanartoqanngilaq, taamaattumillu sinerissap qanittuani Østersømi aalisartut aamma issittormiut peqatigiiffiat Inuit Sila puisinut isiginnittariaaseq allanngorniarlugu suleqatigiipput

Bornholmimi aalisartut pisatik qassutiminnit puisinit amerlaqisunit nerineqartarmata iliuuseqarusullutik saariarfissaarutilerput.

Ukiut qulit ingerlanerini puisit amerlassusaat marloriaatinngorsimapput aammalu saniatigut aalisartut affaannanngorsimallutik. Kalaallit puisinniartartut EU eqqusseqqusiunnaarnerata kinguneranik puisit amiinik tunisatik 90 procentii annaanikuuaat, naak Inuit eqqusseqqusaannginnermut pineqanngikkaluartut puisip amia tusaamanerlunneqalernikuuvoq.

Peqatigiiffiit eqqugaasut
- Aalisartut uagullu uumasunik illersuiniaqatigiiffiit puisi erlinnartuutitut taammassuk illersortariaqarnerarlugulu annertuumik eqqorneqarpugut, puisinniartartut peqatigiiffianni Inuit Silameersoq, Leif Fontaine, tusagassiorfinnut nalunaarummi taama oqarpoq. Qallunaat puisinik isiginnittariaasaat qanoq kinguneqarneranik paasititsiniarluni Bornholmimi aalisartut ikiorniarlugit taanna Bornholmimiippoq.

Leif Fontaine Issittumi avatangiisit pillugit suliniaqatigiiffimmi Inuit Silaminngaanneerpoq, taakku puisinniarnermut inatsisilersuinerit Issittumi innuttaasunut qanoq annertuumik kinguneqartitsisimanerinik paasititsiniaanermik suliaqarput. Taassuma Aaju Peter Nunavumi Canadameersoq Bornholmimeeqatigaa.

Atuaruk: Inuit Sila Issittumi nunani aamma paasititsiniaarusuppoq

Misigissusilersuinani isumatusaarneq
Inuit Silap aalisartut Danmarkimeersut, Sverigemeersut Finlandimilu Ålandimeersut peqatigalugit puisit isigisaanerannik allanngortitsinissamik suliniuteqalerput, politikerit msigissutsit aallaaviginagit isumatusaarneq aallaavigalugu inatsisilioqqullugit kaammattorniarlugit.

Puisinniartartut aamma aalisartut allannguuteqartoqanngippat, taakku inuussutissarsiutit marluk piujunnaassasut siulittuipput.

Ataqqinnittumik
Taakku ataatsimoorlutik nalunaarusiamik saqqummiussipput, 'Puisinut inunnullu inissaqartitsinermik' qulequtalimmik. Taakku kaammattuipput, puisit maanna amerlassusaasa affaat sinnerlugu ikilisarneqassasut.

Saniatigut aamma puisi inuussutissatut isigineqassasoq taakku isumaqarput.

- Puisimmi kusanartorsuarmik ameqarput aammalu neqaa inuussutissaqarluarluni. Inuit pinngortitamik isiginnittariaasaannik ilikkagaqarluarsinnaasugut isumaqarpunga. Inuussutissarisinnaasagummi ataqqinnittumik atortariaqarpagut, tamanilu ataqatigiinneq attallugu, Thomas Thomsen Bornholmimeersoq oqarpoq.

Leif Fonatine aamma Aaju Peter aalisartut peqatigalugit Finlandimut aamma Sverigemut ingerlaqqissapput, politikerit paasititsiniaavigiartorlugit.

Immamut atassuteqarneq
- Nunat avannarliit ataatsimoornerannik nukittuumik tamaani takussallunga neriuppunga. Nunat avannarliit immamut qanittumik atassuteqartuarsimapput, inuillu maaniittut uumasunut silatusaartumik isiginnittariaaseqarnerupput, inunnut allanit uumasunik inequginnittumik isiginnittunut sanilliullutik. Eqqaammallugu tamanna Disneymit titartagaanngimmat, Leif Fontaine oqarpoq.

Aamma atuaruk: Puisip amia: Kalaallit suleqatigiinnissaat Doris Jakobsenimit ujartorneqarpoq

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER