oqallinneq
Qallunaaq politikereq: Nammineq iluarsaassiniaritsi
Amerikamiut aamma qallunaat Kalaallit Nunaanni sakkutooqarfiusimasuni iluarsaassissappata, taava aamma eqqaavissuarni iluarsaassisoqartariaqarpoq, politikeri oqamisaarpoq
Folketingimi Nunarput pillugu ataatsimiititaliameersup Søren Espersenip (DF) eqqakkat nunap ilaani eqqaavissuarniittut tikkuartorlugit apeqquteqarpoq:
- Qaqugu iluarsaassissagassi?
Taanna avatangiisinut inuussutissaqarnermullu ministerimut Esben Lunde Larsenimut (V) apeqquteqarpoq. Politikerip Dansk Folkepartiimeersup ministeri paasissutisseeqquaa:
Atuaruk: Aleqa: Camp Centurymi iluarsaassineq isumagineqarli
- Kalaallit Nunaata Naalakkersuisuisa qeqertap eqqaavissuaqarfii hunnorujulikkaat avatangiisinut naapertuuttumik aamma sunniuteqarluartumik qaqugu aamma qanoq iluarsiniarlugit aallartinniarpaat?
Qallunaat amerikamiullu Kangilinnguanim Camp Centurymi aamma Pituffimmi iluarsaassinissamut akisussaaffiat pillugu oqallittoqarnerata kinguneranik apeqquteqaat takkuppoq.
Kingullermik naalakkersuisoq Suka K. Frederiksen ima oqariartuuteqarpoq:
Atuaruk: Kangilinnguit atuinnarneqarniarnera tusaatissatut tiguaat
- Kangilinnguani avatangiisini saliinissaq Illersornissamut ministereqarfiup isumagissaagaa akisussaaffigigaalu Naalakkersuisut pingaartimmassuk, Suka K. Frederiksen sapaatip akunnerata naanera sioqqullu taanna erseqqissaavoq.
Eqqakkat akoorutissartallik avatangiisini ajortiasuniittut
Kisianni Søren Espersen (DF), Nunarput pillugu ataatsimiititaliami ilaasortaasup maluginiaqquaa, eqqakkanik ''ukiorpassuarni akisussaaffeqanngilluinnartumik eqqaaginnartoqartarsimasoq, aammalu suli eqqaaginnartoqartartoq, eqqakkat suusinnaasulluunniit - eqqakkat akuutissartallit ilisimatuunit issittumi avatangiisini ajortiasuniittunut ajoqutaasunik'' ajornartorsiortoqartoq.
''Kalaallit Nunaanni Namminersorlutik Oqartussat danskit amerikamiullu avatangiisinut ajoqutaasunik iluarsaasinissaannut soqutiginninnerujussuaq'' pissutigalugu apeqqut takkuttoq, politikerip maluginiaqquaa.