Qalerallit: Qaleralinniarneq unitsinneqarpoq
Qeqertarsuup Tunuani ukiumut pisassiissutit tamakkerneqareermata pisassiissutillu sinnerlugit pisaqartoqarsimammat, qaleralinniarneq Naalakkersuisunit unitsinneqarpoq.
Qaammammut pisassiissutit tamakkerlugit pisarineqaraangata aalisarneq nalinginnaasumik unitsinneqartarpoq. Qaammaamili matumani pisassiitutit oktobarip aqqaneq-aappaanili tamakkerlugit pisarineqareeraluartut taamak pisoqarsimannginngilaq.
Oktobarip qaammataani 467 tonsit sinnerlugit pisaqartoqarsimavoq. Tassa pisassiissutigineqarsimasunit 325 tonsit sinnerlugit pisarineqarsimapput.
Tamatuma malitsigisaanik ukiup sinneranut pisassiissutit tamakkerneqareersimapput, ingerlatsinissammullu pilersaarut malillugu aalisarneq ammaateqqinneqassanngilaq.
Naalakkersuisulli naalakkersuisoqarfimmut piumasarisimavaa, aalisarnermi maanna inissisimaffik pillugu isummernissamut tunngavissiortoqassasoq, ukiullu sinnerani susoqassanersoq siunnersuusioqqullugu. Piniarnermut Aalisarnermullu Naalakkersuisoqarfimmi pisortap Jørgen Isak Olsenip ilisimatitsissutigaaa isummernissamut tunngavissaq suli suliarineqartoq.
IA ammasumik siunersiueqatigiissitserusuttoq
Aalisarnermut, Piniarnermut Nunalerinermulllu Ataatsimiititaliami siulittaasup tulliata Aqqaluaq B. Egedep (IA) Naalakkersuisup suliamik isumaginninnera naammaginngilluinnarpaa.
- Aalisarnermut, Piniarnermut Nunalerinermullu Naalakkersuisup oktobarimi pisassiissutit nungoreeraluartut, taamalu ukiup sinneranut pisassiissutissat nungoreeraluartut aalisarnerup ingerlatiinnarneqarnissaanik aalajangersimanera akisussaassuseqannginneruvoq, taanna oqarpoq.
Sermitsiaq.AG-mit Piniarnermut Aalisarnermullu Naalakkersuisoq Jens Immanuelsen oqaaseqartikkusunneqarsimagaluarpoq, taannali suliap suliarineqarnerani oqaaseqarumasimanngilaq.
Aqqaluaq B. Egede isumaqarpoq, Naalakkersuisup Jens Immanuelsenip aalajangernerminut tunngaviusut qularutigineqalissanngippata aalajangiisimanini ammasumik nassuiartariaqarai.
- Naalakkersuisup akisussaassuseqanngitsumik iliuuseqarsimanerata takutippaa, nuna tamakkerlugu ataatsimeersuartoqarnerani tamatuma aalisartunut kingunerluuteqarsinnaanera sioqqullugu Siumumi arlaannik nuannaartitsiniarsimanini. Minnerpaamik nassuiaateqartariaqarpoq, taamaammallu kissaatigisimavarput siunersiueqatigiinnermut peqataanissaa. Aamma kissaatigisimavarput ammasumik siunersiueqatigiittoqassasoq, Aqqaluaq B. Egede oqarpoq.