Skip to main content

Qalerallit: Pisassiissutit arlallit nussorneqartut

Qeqertarsuup Tunuani, Upernavimmi Uummannamilu qaleralinniartut aasaanerani tamarmi aalisaannarnissaat anguniagaasimagaluartoq, sapaatip akunnerani matumani nalunaarutigineqarpoq, qaammammut pisassiissutigineqarsimasut nungunneqalermata aqutsiveqarfinni marlunni ulloq ataaseq aalisarneq unitsikkallarneqassasoq. Taamatulli nalunaaruteqartoqarmat aqanguani nalunaarut allanngortinneqarpoq.

Naalakkersuisut juunip qaammataani aalajangerput, aasakkut aalisartut silagissiorlutik aalisarnerisa qiteqqunneranni aalisaneq matunaveersaarniarlugu Qeqertarsuup Tunuani Upernavimmilu juunimut pisassiissutigineqarsimasut 350 tonsinik juulimullu pisassiissutigineqarsimasut 350 tonsinik ilaneqassasut.

Taamaakkaluartoq pingasunngormat nalunaarutigineqarpoq qaamaammut pisassiissutigineqarsimasut nungulluinnalersut, taamaammallu Qeqertarsuup Tunuani Upernavimmilu aalisarneq unitsinneqartariaqartoq.

- Taamaattumik ulloq 30. juli 2021 nal. 23.59 aamma tunitsiviussaaq kingulleq, ullorlu taanna aalisaatit tamarmik qaqinneqariissapput. Aalisarneq aqutsiveqarfinni marlunni ammaqqinneqassaaq ulloq 1. august 2021, Aalisarnermut Piniarnermullu Naalakkersuisoqarfik taamanikkut allappoq. 

Matusinermi ulloq ataasiinnaq pineqarpoq. Sisamanngormalli naalakkersuisoqarfik allatut nalunaaruteqarpoq.

- Naalakkersuisup aggustip qaammataanut pisassiissutit juulip qaammataanut nuuppai, Upernavimmi Qeqertarsuullu Tunuani juuli naallugu umiatsiaararsorluni qaleralinniartoqarsinnaaniassammat, nalunaarut naattoq taamatut nipeqarpoq.

Kukkunerusoq

Aalisarnermut Piniarnermullu Naalakkersuisoqarfimmi pisortap tulliata Pollas Lyberthip Sermitsiaq.AG-mut ilisimatitsissutigaa, aqutsiveqarfinni marlunni aalisarnerup unitsinneqarnissaa pillugu nalunaaruteqarsimaneq kukkunerusoq, aggustimut pisassiissutigineqarsimasut qaammammut matumunnga nuunneqarsinnaammata. 

Naalakkersuisoqarfiup pisassiissutinik nuussisinnaaneq, siorna decembarip qaammataani nalunaarut nutaaq atuutsinneqalermat pisinnaatitaaffinngorsimasoq ikiorsiullugu ukiup sinnerani pisassiissuteqartoqarnissaa pilersaarutigaa.

Sineriammut qanittumi qaleralinniartarneq pillugu nalunaarut nutaaq aqqutigalugu aalisariutit seks meterit sinnerlugit angitigisut 2020-mi pisarinngitsoorsimasaat qaammatinut sinneruttut nuunneqarsinnaanngorsimapput, matumani pisassiissutit nungussimaneranni ajornartorsiuteqartoqartannginnissaa anguniarneqarsimalluni.

Siorna pisarineqarsimasut naatsorsorneqarnerat sapaatip akunnerata ataatsip missaa qaangiuppat naammassineqarsimanissaat naatsorsuutigineqartoq, Pollas Lyberth ilisimatitsivoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER