Qalerallit: Naalakkersuisut pisassiissutinut nutaamik aaqqiissuteqarput
Aqutsiveqarfinnit pingasunit 3. kvartalimit katillugit 800 tonsit nuunneqarput, kvartalimi siullermi pisassiissutit nungulermata. Aalisartut maanna marsip sinnerani aalisarnerminnik nangitsisinnaapput.
Aalisarnermut naalakkersuisup aqutsiveqarfimmut Qeqertarsuup Tunuani, Uummannami Upernavimmilu umiatsiaararsortunut qaammatinut pingasunut pisassiissutigineqartut marsip 17-ianni naleqqussaavigai, qaleralittassiissutigineqartut nungulermata.
Naalakkersuisoqarfik nalunaarummi naatsumi taama ilisimatitsivoq.
Katillugit qaleralittassiissutit 800 tonsit ukioq manna 3. kvartalimit kvartalimut siullermut nuunneqarput.
- Taamaalilluni marsip naanissaata tungaanut qaleralinniartoqarsinnaassaaq, aalisarnermut naalakkersuisoqarfik allappoq.
Pisassiissutit ima nussorneqarput:
- Qeqertarsuup Tunuani kvartalit pingajuannit 300 tonsinik nuussisoqarpoq.
- Uummannami kvartalit pingajuannit 400 tonsinik nuussisoqarpoq.
- Upernavimmi kvartalit pingajuannit 100 tonsinik nuussisoqarpoq.
Ukioq manna pisassiissutit 20 procentinik amerlanerusut
Qeqertarsuup Tunuanut Upernavimmullu ukioq manna qaleralittassiissutinut siunnersuinermi annertuumik allannguuteqartoqarpoq. Siunnersuineq 20 procentinik qaffanneqarpoq. Siunnersuinermi peqassutsimik nalunaarsuinerit amigartut pineqartillugit najoqqutassat malillugit innersuussisoqarpoq. Periutsimi naatsorsuusiornermi atorneqarput ukiuni kingullerni pingasuni peqassuseq oqimassusinngorteriarlugu inernerata agguaqatigiissinneqarnera, ukiut siulii aamma siuliiniinut nallersuunneqarnerisigut-
Nalunaarsukkat 20 procentimik amerleriaateqarneq ersersippaat, siulianut siunnersuinermut amerleriaatigineqartussanngorluni.
Uummannami 2023-2024-mut siunnersuineq allanngunngilaq.
Upernavimmi, Uummannami aamma Qeqertarsuup Tunuani sinerissap qanittuani umiatsiaararsorluni qaleralinniarnermi kvartalimut pisassiissutit atulerseqqinniarlugit Naalakkersuisut siorna aalajangiuppaat.