Qalerallit: Akuersissutinik tunioraaneq suli taamaatissanngitsoq
Inuusuttunut aalisarnermik ilinniagaqartunut sinerissap qanittuani aalisarsinnaanermut akuersissummik pissarsisinnaaneq suli periarfissaassaaq. Pisassiissutillu naammapput, §37 naapertorlugu tamanna pillugu akissummi taama oqariartuuteqartoqarpoq.
Ukiumi Qeqertarsuup Tunuani, Upernavimmi Uummannamilu pisassiissutit ataavartumik qaffanneqaqattaarput, pingaartumillu ukiup naalernerani. Naalakkersuisut pisassiissutit nunneqarsinnaasutut nalilerpaat, tassa ukiut siuliinit allanut pisassiissutit imaluunniit pisassiissutit aalisarneqarsimanngitsut nuunneqarlutik.
Pisassiissutit nuunneqarsinnaasut pillugit paasissutissat Aqqalu Jerimiassenimut (A) akissutigineqartumi atuarneqarsinnaapput, taassuma Naalakkersuisut akuersissutinik agguaanerit unitsissappatigit qanoq isumagineqarnissaannut pilersaaruteqartoqarnersoq apeqqutigaa, aammalu Naalakkersuisut akuersissutinik killeqanngitsumik agguaaleraangata pisassiissutit nungujaartarnerannik aaqqiissuteqarnissamut Naalakkersuisut qanoq pilersaaruteqarnersut.
Akuersissutinik agguaasarneq maanna unitsinneqanngilaq
Kisianni akissuteqaammi pisassiissutit naammattut atuarneqarsinnaavoq, sulilu ilaatigut inuusuttunut 19-it aamma 29-t akornanni ukiulinnut akuersissutinik nutaanik pisoqarsinnaanera periarfissaaginnassasoq.
Aalisarsinnaanermut akuersissummik pissarsiniarnermi, qinnuteqartunut ukiut siuliini assingusumik akuersissutaateqarsimasunut tunniunneqartarnissaa malittarisassanut ilaavoq, aammattaarlu ilaatigut qinnuteqartunut 18-it aamma 29-t akornanni ukiulinnut, imarsiornermik ilinniarfimmi ilinniarsimasunut, imaluunniit allatut assingusumik piginnaasaqalersimasunut immikkut akuersissuteqartoqarsinnaavoq.
Immikkut akuersissut taanna § 37 naapertorlugu apeqqummut aalisarnermut piniarnermut naalakkersuisumit Karl Tobiassenimit (S) akissuteqaammi aamma oqaatigineqarpoq, akuersissutinillu tunioraaneq unitsinneqanngitsoq taassuma naqissuserpaa, aamma maannamut tunioraanermik unitsitsisoqarnissaanik pilersaaruteqartoqanngitsoq.
Aalisarneq pillugu Ataatsimiititaliarsuup isumaliutissiissutaa, inuussutissarsiornerup qanoq nunap karsianut iluaqutaanerpaasumik peqatigisaanillu piujuartitsiffiunissaanik pitsanngorsarneqarsinnaanera ukiut marluk suliarineqareerluni juulimi 2022-mi tunniunneqarpoq.
Pissutsit allanngunnginnissaat periarfissaanngitsoq
Aalisarnermik aqutsineq pisassiissutinik niuerutigineqarsinnaasunik nammineq pigisanik, ullumikkut raajarniarneq assigalugu tunngavilersorneqassasut, isumaliutissiissummi inerniliunneqartut pingaarnerit ilagaat.
Innersuussut malinneqassappat, paggatassiisoqartarnera atorunnaarsinneqarneranik kinguneqassaaq, ilaatigut taanna umiatsiaaqqanut 6 meterit tikillugit angissusilinnut Qeqertarsuup Tunuani, Uummannami aamma Upernavimmi aqutsiveqarfimmi 47-mi sinerissap qanittuani qaleralinniarnermi periuserineqartarpoq.
Pisassiissutit TAC-it katinnerisa biologit siunnersuinerannut naleqqussarneranni piffissami akuersissutinik tunioraasarnermut unitsinneqarnissaa, Aalisarneq pillugu Ataatsimiititaliarsuup aamma innersuussutigaa.
- Pissutsit allanngunnginnissaat periarfissaanngilaq, ataatsimiititaliarsuaq taakkartorneqartumut kingullermut taama naliliivoq.
Ukiup matuma ingerlanerani aalisarnermut inatsimmut nutaamut siunnersuut saqqummiunneqassasoq naatsorsuutigineqarpoq, tassanilu innersuussutigineqartut aalisarneq pillugu ataatsimiititaliarsuarmeersut allat ilanngunneqassanersut paasinarsissaaq.