Aalisarneq

Qalerallit Qeqertarsuarmi neriulersitsipput

Qeqertarsuarmi aalisartut illoqarfiup eqqannguani qaleralinnik pisaqamapput, tamannalu illoqarfimmi aalisakkanik suliffissuarmi ulapitsitsivoq. Tamanna illoqarfiup pitsaanerusumik siunissaqarneranik neriulersitsivoq, ukiuni kingullerni suliffissaaleqisut erloqinartumik amerliartupiloorsimagaluarmata

Assi toqqorsivimmit

Qeqertarsuarmut 800-t missaannik inulimmut, ukiuni kingullerni inuussutissarsiornerup appariartupiloorneranik misigisaqarsimasumut, kiisami nuannersumik pisoqalerpoq.

Illoqarfimmi suliffissaaleqisut aatsaat taama amerlatigalutik ukiuunerani 80-it missaannik amerlassuseqarsimapput.

Aasaq mannali sulifissaaleqisut 40-t inulermatigit illoqarfik neriuutissaqaqqilerpoq. Neriuutissaqalernerli ilimaginngisamit pivoq. Illoqarfiup eqqaani imaq qaleralippassuaqalersimavoq aalisartut ulapitsilerlugit.

Misileraalluni aalisarneq
Illoqarfiup aalisartui ukiuni kingullerni namminneq piumassutsiminnik Qeqertarsuup eqqaani qeqertallu Imerissut, Qeqertarsuup Kitsissuarsuillu akornanniittut, eqqaanni misileraallutik aalisartarsimapput - iluamilli pisaqartarsimanatik.

Ilungersornerli ukioq manna kinguneqarpoq. Aatsaat siullerpaamik Imerissut kangianni 800 meterit missaannik itissusilimmi ningittakkanik pisaqamasoqalerpoq, tamaani umiatsiaararsortut angisuunik amerlasuunillu qaleraleqarfinnik nassaarsimammata. Aalisarfik tamanna illoqarfimmit umiatsiaaqqamik minutsit 30-t missaat atorlugit tikitassaavoq.

Oqaluttuaq tamaat atuaruk, Qaasuitsullu Kommuniani angisuunik mikisunillu qanoq pisoqarnera atuarlugu. Aviisi sapaatip akunneranut saqqummersartoq Tamanut Avannaani akeqanngitsumik aasinnaavat uani:

Powered by Labrador CMS