Skip to main content

Qalerallit avataani pisat MSC-mut nalilerneqalersut

Kalaallit Nunaanni MSC-mik suleqatigiittut maanna qalerallit nunatsinneersut allagartartaartinnialerpaat. Qalerallit avataani pisarineqartut siulliullugit

Sivisuumik oqaluuserineqarsimavoq, maannali qalerallit avataani pisarineqartut MSC-mik meqqilerneqarnissaannik sulineq aallartinneqalerpoq.

MSC-mik meqqilerneqassagaanni piumasaqaataavoq piffissamut sivisuumut aalisarnermut pilersaarusiorneq, aammalu angallatini suleriaatsinut sinaakkutat aalajaannerunissaat.

Norgemit ikiorteqarluni

Royal Greenland nittartakkamini allappoq Sustainable Fisheries Greenland suleqatigalugu norskit ingerlatsiviat Veritas isumaqatigiissuteqarfigineqarsimasoq kitaata avataani qalerallit pisat nalilersornissaannik, MSC-mik allagartaqalernissaat siunertaralugu.

Qalerallit nalilerneqarnerannut, ukiup ataatsip missaanik sivisussuseqartussatut naatsorsuutigineqartumut, apeqqutaavoq allagartartaarniarnermi suliap qanoq ingerlanera, tusarniaanertaa ilanngullugu.

– Qalerallit avataani pisarineqartut allagartartaartinnerisigut aalisagaatitta pingaarnersaasa ilaat MSC-mik pitsaassusilerneqarnissaa misilitseqqissavarput, Royal Greenlandimi CSR-imut akisussaasoq Lisbeth Due Schoenemann-Paul naliliivoq.

Arfineq-marlunnik immikkoortulik

– Aalisarneq tamanna MSC-mut akuersissutigineqassappat qularnanngitsumik tamanna nunarsuarmi siullersaassaaq, tamannalu aalajangiisuulluinnassaaq allagartartaarneq tuniniaanermut pingaaruteqassappat. Qalerallit MSC-mik meqqillit Europami piumaneqartorujussuupput, pisisartuttalu qilanaaraat atuisartunut tuniniaqqinnissaat.

Allagartartaarnissamut piumasaqaatit naapertorlugit nalilersuineq arfineq-marlunnik immikkoortoqarpoq, qalerallit nunatsinneeersut allagartartaartinnissaannik aalajangiisoqassatinnagu.

– Aalisarneq  siumoorutaasumik nalilerneqareersimavoq, taassumalu inernerata takutippaa tamakkiisumik naliliinissamik ingerlaqqinnissamut tunngavissaqartoq. Taamaattumik isumaqarpugut aalisarnerup allagartartaartinneqarnissaanut periarfissarissaartoq. Allagartartaartitsinissamut tamatigut pisariaqartarpoq suleqatigiilluarnissaq, suliamut immikkut ilisimasalinnik oqartussaasunillu, allagartartaartitsiniarnerullu ingerlarngani suleeqatigiilluarnissaq qilanaaraarput, allanik allagartartaartitsiniartarnitsitut, Lisbeth Due Shoenemann-Paul oqarpoq.

Qaleralinnik pisat 25 procentii nunamut tulaanneqartarput suliffissuarnilu suliarineqarlutik, tamatumalu kingorna europami asiamilu tuniniaavinnut tunineqartarlutik. Sinneri qeritillugit avammut tuniniarneqartarput, pingaartumik Asiamut.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER