Qalerallit aalisartukkormiut Ilulissanut nutserarnerannut pissutaasut
Aningaasatigut isertitassanik periarfissagissaarnerup aalisartukkormiut amerliartuinnartut Ilulissanut nutserartippaat. Aalisariutilli amerlineri kinguneqarnerlussiinnaasut aalisartut piniartullu peqatigiiffianni ilaasortat isumaqarput.
Avannaani illoqarfiit aalisarfiusut annersaanni Ilulissani aningaasarsiorluarnissamut periarfissagissaarpoq. Aalisarfiit minuttialuit ingerlanerinnaanni tikinneqarsinnaapput, periarfissallu tamakku pissutaallutik ukiumut aalisartut arlaqartut piffinnit allaneersut qaammatini arlalinni Ilulissani 4500-t missaanni innuttalimmi najugaqartarput.
Ukiulli kingulliit ilaqutariit aalisartukkormiut illoqarfinnit nunaqarfinnillu allanit Ilulissani najugaqalivinnissaq toqqartarpaat. Johan Villadsen Ilulissani aalisartut piniartullu peqatigiiffianni IAAP-mi siulittaasuusoq oqarpoq. Kikkut tamarmik qaleralinniarnermi inissaqartut isumaqaraluarluni aarlerinartoqartippaa aalisarfinni aalisariutit amerlinerisigut aalisarfissarsinissaq ajornarsissammat.
Periarfissanik pitsaanerusunik ujartuinerup ilaqutariit Qasigiannguaneersut inuuniarnikkut pitsaanerusumik atugassaqartippai, taakkuli 2016-imi illoqarfimmut eqqaamiuminnut nuussalluti toqqarpaat.
Aningaasaqarneq pitsaanerusoq
Ejner Sandgreen Qasigiannguaneersoq siornatigut Qasigiannguit eqqaanni saarullinniartuusimavoq, qaleralinniarnerli akisunerummat aalisarfissallu pitsaanerummatailaqutariit pingasunik meerartallit aasaanerani nalunaaqutaq kaajallallugu aalisarfiusumut nuunnissartik 2016-imi toqqarpaat.
– Aalisarneq pitsaasumik ingerlavoq, aalisagaqarluarporlu. Ukiut marluk matuma siorna qaleraleqassuseq ernumanartumik inissisimavoq, ukiulli marluk ingerlaneranni siuarianeq malunnarpoq. Uanga nammineerlunga ullormut agguaqatigiisillugu 500 kilo-t pisarisarpakka, Royal Greenlandillu Ilulissani aalisakkeriviani tunisinermut akigititai kilomut 26 kroniupput. Taamaammat umiatsiannut akilersuinera malinnaaffigisinnaavara, bankimut atorlunga umiatsiarsinikuugama, oqarpoq.
Allaaserisaq tamakkerlugu aviisimi Sermitsiami saqqummeqqammersumi atuarsinnaavat. Aviisi uani ataani pissarsiarisinnaavat: