Qaleralittassiissutit allanngortinneqartuartut
Qeqertarsuup Tunuani umiatsiaararsorlutik qaleralinniat qaammatinut pingasunut pisassatik tamakkereersimagaluarlugit, qaleralinniarnertik ingerlatsiinnarsinnaavaat. Naalakkersuisut ukiup sinneranut pisassiissutit ilaannik kvartalimut matumunnga nuussisimammata.
Avannaani sineriammut qanittumi aalisartunut pisassiissutit allanngortinneqartuarput. Siullermik ukiumut pisassiissutinngortinneaqarput, taava qaammatinut pingasunut pisassiissuteqartoqartalerpoq, naggataatigullu qaamaammut pisassiisoqartalerluni.
Qaamaammut pisassiissuteqartarneq atorunnaarsillugu ukiumut pisassiisoqartalernissaanik aalajangersimaneq decembarip qaammataani allanngortillugu qaammatinut pingasunut pisassiissuteqartoqartalerpoq. Taamatut allanngortiteriuartoqaraluartoq pisassiissutigineqartartut tamarmik amerlanerulersinneqartanngillat.
Taamaammat Piniarnermut Aalisarnermullu Naalakkersuisoqarfik aalisartut piffissap sinnerani aalisaannarnssaat qulakkeerniarlugu, ukiup sinneranut pisassiissutinik aalleqqittariaqarsimavoq.
Ukiup sinneranut pisassiissutinik arlaqartuni aallertarneq
Naalakkersuisoqarfik maajip 25-ani nalunaaruteqarpoq, Qeqertarsuup tunuani umiatsiaararsorluni qaleralinniarneq ulloq 29.05.2022 unitsinneqassasoq.
Taamatulli nalunaaruteqartoqarneraniit ullut marluk qaangiutiinnartut aalisarnermilu atortut suli qaqinneqanngitsut umiatsiaararsortunut immikkut 600 tonsinik pisasseeqqittoqarsimavoq, umiatsiaararsorlutillu aalisartut Qeqertarsuup Tunuani aalisarnerminnik ingerlatsiinnaarsinnaanngorlutik.
Periuseq tamanna siornatigut atorneqartarpoq, aalisartut silaginneranik atorluaaallutik sapinngisamik sivisunerpaamik aalisarsinnaanerannik periarfissinniarlugit. Taamaammat aalisartut qaammatit pingasukkaartut pingajuanniit 300 tonsit qaammatit pingasukkaartullu sisamaanniit 300 tons-inik pisassiissutinik qaammatit pingasukkaartut aappaannut nuussinerup kingorna naleqqussaavigineqarput, Naalakkersuisut nittartakkamikkut allapput.
2022-mut pisassiissutit
Qeqertarsuut Tunuani 4.252,73 tons
Uummannaq 6.462,13 tons
Upernavik 5.158,08 tons