Qaleralittassat inassutigineqartut marloriaataannik amerlineqartut
Naalakkersuisut Qeqertarsuup Tunuani qaleralittassat 2.400 tonsinik ilavaat
Naalakkersuisut Qeqertarsuup Tunuani sineriammut qanittumi qaleralittassat tamarmiusut 10.580 tonsinut qaffanneqarnissaat aalajangersimavaat.
Taamaalilluni aalisagartassat 5.120 tonsiusut imminut akilersinnaasutut nalilerneqarsimasut marloriaataat sinnerlugit amerlineqarput.
2.400 tonsinik immikkut pisassiissuteqarnikkut Qeqertarsuup Tunuani pisassiissutigineqartut tamarmiusut siorna 9.200 tonsiusunit amerlanerulerput.
Aalajangiineq Naalakkersuisut namminneq ingerlatassatut nalunaarutigisimasaannut akerliuvoq.
2019-imut qaleralittassiissutit siorna novembarip qaammataani aalajangersarneqaramik 2018-imut sanilliullugu ikinnerugaluarput, taamanilu nalunaarutigineqarpoq, ‘TAC, ukiuni sisamani pisassatut akuerisaasut, biologit inassutigisartagaannut naleqqussarneqassasut.'
Umiatsiaararsortut pisassatik tamakkersimalerpaat
Pisassiissutinik qaffaanermut tunngavilersuutigineqarpoq, umiatsiaararsortut sapaatip akunnerata ingerlanerani pisassatik tamakkerlugit pisarereertussaagaat. Pisassiissutit 46,7%-ii suli pisarineqanngillat.
- Pisassiissutit qaffanneqarnerisigut Qeqertarsuup Tunuani umiatsiaararsortut ukiup sinnerani 1.373 tonsinik pisassaqassapput, pisassallu taakku qaammatinut agguataarneqassallutik. Pisassiissutit amerlineqarnerisigut naatsorsuutigineqarpoq 2019-ip sinnerani aalisartoqarsinnaalissasoq, Naalakkersuisut pisassiissutinik qaffaanerminnut tunngavilersuutigivaat.
Aalisakkat ikinnerit mikinerillu
Qeqertarsuup Tunuani qalerallit tassaapput tatineqarnerpaasut. Ukiumiit ukiumut pisassiissutit biologit inassutaannit amerlanerujussuusarput, tamatumalu kinguneranik qalerallit milliartuinnavissimapput, taamaalilluni aalisarnerup imminut akilersinnaanera annikilliartuinnavissimalluni.
- Biologit Qeqertarsuup Tunuani kilisaatit qassutillu atorlugit misissuisimanerisa aalisanermilu kisitsisitigut paasissutissat takutippaat qalerallit ikiliartortut. Peqatigitillugu kisitsisitigut paasissutissat malillugit takuneqarsinnaavoq, ukiuni qulini kingullerni qalerallit pisarineqartartut mikinerulersimasut aamma
aalisakkat anginerit ikinnerulersimasut, Pinngortitaleriffik siorna aasaanerani allappoq.
Aalisakkat amerlanerit pisarineqartariaqartut
Peqatigitillugu pisassat tonsiusut amerlaqqataannik pisaqarniaraanni qalerallit amerlanerit pisarineqartariaqarput.
- Tassa akilersinnaasumik aalisartoqassappat ukiut qulit matuma siornatigut pisarineqartartut marloriaataat ullumikkut pisarineqartariaqarput. Allatut oqaatigalugu, ukiut qulit matuma siornanut sanilliullugu qalerallit amerlanerujussuit pisarineqartarput, taamaammallu aalisakkat ullumikkut annertunerujussuarmik tatineqalersimapput, Pinngortitaleriffimmit taamak oqaaseqartoqarpoq.