Qaleralinniarneq qummut amerlassusissap killinganut qanittumiittoq
Qaleralinniarluni aqutsiveqarfiit avannaaniittut qummut amerlassusissaminnut qanillattorput, Aalisarnermut Naalakkersuisoq Nikkulaat Jerimiassen ilisimatitsivoq.
Naalakkersuisut aalisartunik ikilisaaniarlutik pilersaaruteqanngillat.
Paragraf 37 naapertorlugu Aqqaluaq B. Egedep apeqqutaanut akissummi atuarneqarsinnaavoq, inuit piginnaasamikkut aalisartunngorusuttut maleruagassani piumasaqaataasut naammassisimagunikkik aalisarsinnaanermut akuersissummik qinnuteqaatigisaat akuerineqartussaapput. Malittarisassat taamaapput, tamanna oqaatigineqarpoq.
Piujuaannartitsisumik aalisarneq
Kisianni akissummi oqaatigineqarpoq, ”Naalakkersuisut qulakkiissavaat aalisagaqatigiit piujuarnissaat siunertaralugu aalisartitsisoqassasoq aammalu aalisartut isertitamikkut imminut napatissinnaanissaat”.
Naak avannaani qaleralinniarnermi qummut amerlassusissaq qanillattorneqaraluartoq, Nikkulaat Jeremiassenip aalisartut ikilisarnissaannut pilersaaruteqanngilaq, aalisarsinnaanermullu piumasaqaatinik naammassinnikkaannik akuersissummik pissarsisarnerup aalisarnermut inatsimmi nutaami allannguisoqarnissaa siunertaanersoq ilisimatitsissutigineqanngilaq.
Isertuussisut
Aalisarnermut inatsit nutaaq pillugu Jeremiassenip ilisimatitsissuteqarsinnaanera annikippoq. Partiit siuttuisa Ilulissani ataatsimiinnissaat sioqqullugu suli isertuussisoqarpoq, tassani aalisarnermut ataatsimiititaliarsuaq pillugu apeqqut oqaluuserisassanut ilaavoq.
- Aalisarnermut inatsimmi politikkikkut piumasaqaatit Naalakkersuisuniit suuppat, Aqqaluaq B. Egede aperivoq.
Aalisarnermut Naalakkersuisoq akissummut allamut imaattumut innersuussivoq:
- Aalisarneq pillugu ataatsimiititaliarsuarmik pilersitsisoqarnissaa sulissutigineqarpoq, maannalu politikkikkut suliassanngorlugu tunniunneqarnikuulluni.
Ilulissani ataatsimiinneq
Jeremiassen partiimi siuttut Kim Kielsen aamma Vittus Qujaukitsoq kiisalu Aqqalu Jerimiassen, Siverth K. Heilmann napparsimasoq sinnerlugu peqataasoq, marlunngornermi Ilulissanukartut, Sermitsiaq.AG-p paasivaa. Naalakkersuisoqatigiinnut partiip tapertaasup siuttua, Niels Thomsen, Demokraatit, ataatsimeeqatigissavaat, tassanilu aalisarneq pillugu ataatsimiititaliarsuup suliassai isumaqatigiissutiginiarsarissavaat.