piumasaqaatit
Qalasersuarmut russit piumasaqareersut Greenpeacep oqariartuutaa: Qalasersuaq unammissutigeqinagu
Ruslandip Issittup imartaata ilaanik piginnittuujumalluni piumasaqaateqarnera Issittumi pisariaqanngitsutut salliuniarnermullu alloriarnerinnaasoq, Greenpeacemit oqariartuuteqarput
Issittup ilaannik piginnittuujumalluni Danmark siorna saqqummiussivoq. Issittup ilaanik annertoorujussuarmik piginnittuujumalluni Rusland maanna saqqummiussivoq - piumasarisaatalu ilaa Danmarkip piumasaqaataata ilaaniippoq.
Qalasersuaq unammissutigineqartariaqanngitsoq Greenpeacemit oqariartuuteqartoqarpoq.
- Nunarsuatsinni assingusumik Qalasersuaqanngilaq, taamaammat una pissaaneqarniunnertut isigineqartariaqarpoq.
- Paasisinnaanngilarput sooq Qalasersuaq taama soqutigineqartiginersoq, tassami avatangiisit silaannaallu pissusaat soqutigineqanngilluinnarput oqallinnermi, Greenpeacep issittumi ataqatigiissaarisua Jon Burgwald oqarpoq.
Russit ukiuni arlalinni sukumiisumik misissuereerlutik, immap naqqaniittut quassuit Mendelejev aamma Lomonosov pigisaralugit isumaqartut, nutaarsiassaqartitsiviup Barents Observerip allaaseraa.