QAK avannaani nipisat suanniarnerup ammarnissaanut piareersimavoq
KNAPK Nuup eqqaani nipisat suanniarnerup ammarneqarnissaanut ullormik nalunaaruteqarnissamut piareersimanngilaq, Royal Greenlandip aki aallarniutaasussaq nalunaarutaa naammaginnginnamiuk. Siulittaasuusimasulli Henrik Sandgreenip avannaani tamanna naammagaa.
KNAPK-p Paamiuni immikkoortortaqarfia assigalugu QAK, Qalerualinniat Aalisagarniallu Kattuffiat, aalisartut aallartinnialerpata nipisanniarnissap ammarnissaanut piareersimavoq.
Avannaani piffissanngorpat tunisinissap aallartinnissaanut KNAPK ilungersorfigeqqaarneqassanngilaq. QAK-mi siulittaasoq, Henrik Sandgreen, Sermitsiaq.AG-mut taama ilisimatitsivoq.
- Kujataani ilaasortaqanngilagut. Taamaammat tamanna akuleruffigissanngilarput. Kisianni avannaani ilaasortagut piareeriarpata, imarorpat aamma qaqugu piareernerlutik oqaatigippatigu, taama aalisarnerup aallartinnissaa Naalakkersuisunut nalunaarutigissavarput, KNAPK-mi siulittaasuusimasoq Henrik Sandgreen naqissusiivoq.
Kattuffik sorleq nalunaaruteqassanersoq inatsiseqanngitsoq
Aqutsiveqarfik 1E-mi Paamiut eqqaani KNAPK immikkoortortaqarfianit 10. april kaammattuinerup kingorna aalisarneq ammarneqarpoq, KNAPK siulersuisuunerisa Royal Greenlandip aki nalunaarutigisaanik akuersiumannginnerata kingorna.
Nipisanniarnermut isumaqatiginninniarnermi periuseq ajunngitsoq, Henrik Sandgreen isumaqarpoq, Royal Greenlandillu aki nalunaarutigisaa aalisartut pissarsiassaata assigisariaqanngikkaa oqaatigaa.
- Aalisartuvut nammineerlutik tunitsivinnut akinik isumaqatiginninniarsinnaapput, taamaattuaannarnikuupput.
Nammineq isumaqatiginninniarnerit ilungersuutigisimagai
Henrik Sandgreen ukiuni arfineq-pingasuni KNAPK-mi siulittaasuunikuuvoq, tassungalu atatillugu nipisat suaasa tunineqarnerani aki isumaqatiginninniutigisarsimavaa. Maannali saqitsaanneq ingerlasoq oqaaseqarfigerusunngilaa.
- Maanna pisut ilisimasaqarfigerpianngilakka, taamaammat akuleruffiginianngilakka, kisianni uagut (QAK, aaqq.) ileqqoq malillugu Royal Greenlandimut akimik isumaqatigiissuteqarusuppugut.
KNAPK-mi siulittaasuunermini isumaqatiginninniarnerit aporaaffiusarsimasut, taassuma aamma oqaatigaa.
- Taakku (Royal Greenland, aaqq.) akimik nalunaaruteqartarput, tassanngaanniillu isumaqatiginninniartarpugut. Soorunami siornatigut isumaqatiginninniarnerni ajornartorsiuteqartarnikuuvugut, kisianni illuatungeriit akornanni nammineq aaqqittarpavut. Taamatut periuseqarneq ajoquteqarnikuunngilaq, Henrik Sandgreen oqarpoq.