Qaasuitsup siunissaa pillugu annertuumik paatsiveerusimaarneq

Avitsinisssamut aalajangiisoqannginnerani, kingunerisinnaasat tamarmik qulaajarneqaqqaassapput.

Naalakkersiusut siulittaasuat, Kim Kielsen (S), Naalakkersuisut ullut marluk matuma siorna kommunit aaqqissuussaanerat sisamanik kommuneqartoq attatiinnarneqarnissaa kissaatigalugu nalunaarutigereernerisa kingorna, ullumi taama oqarpoq.

Isornartorsiuineq
Qaasuitsup avinneqarnissaanik borgmesterit sisamat aamma Kanukoka kissaatiginninnginnerannik ataasinngormat oqaluttuarnerat pillugu, siulittaasup tusagassiorfiit isornartorsiorpai.

- Aalajangiivugut avitsinissamut aalajangiisoqannginnermi, kingunerisinnaasat tamarmik qulaajarneqaqqaassasut, Kielsen pingasunngornermi oqarpoq, Inatsisartullu aalajangiineq inaarutaasoq taasissutigisussaagaat ilanngullugu oqaatigaa.

Atuaruk: Kim Kielsen: Qaasuitsoq avitsinermut nammineq akiliissaaq

Akisooq
Siulittaasup Naalakkersuisoqarfianit ataasinngormat oqaatigineqarpoq, 'kommunip avinneqarnerata nuna tamakkerlgu eqqussagaa aammalu akisussasoq', taamatullu Naalakkersuinikkut Ataqatigiissaarisoqatigeerisimasaasa innersuussaat, tassa maanna kommunit aaqqissuussaanerat attanneqarnissaanut atorneqassasoq.

Atuaruk: Qaasuitsoq avinneqalinngilaq

Taanna borgmesterinit tamanit, Naalakkersuisunit kiisalu kommunit kattuffiannit Kanukokamit atsiorneqarsimavoq.

Akerliliineq
Qaasuitsup Kommunianiillu aamma ullumi borgmesterit imaluunniit Naalakkersuisuni ilaasortat maannakkuugallartoq kommunit ilaqqinnissaannik kissaateqannginnerannik oqariartortoqarnerata kingorna akerliliisoqarpoq.

Borgmester Ole Dorphilli tusagassiortut naqqinnagit, Kielsen naqqippaa.

Uninngitsoq
- Qaasuitsup Kommunia sinnerlugu matumuuna nalunaarutigissavara, Naalakkersuisut tusagassiutitigut Qaasuitsup Kommuniata avinneqarnissaanik Politikkikkut Ataqatigiissaarisartut ataatsimeereernerani inerniliussami unitsitsisimaneraaneq ilumuunngitsutut issuaanerummat, Dorphi tusagassiuutinut nalunaarummi allappoq.

Ernumassuteqarneq
- Tamanna pillugu erseqqissaatigissavara issuarneqarsimanera ilumuunngimmat. Isumaqatigiissutaasorli tassaavoq aarleqqutigineqarmat kommunit avinneqarnerata kingunerissammagu kommunini allaffissornerup pitsaassusaanik assigiinngitsunik sullissisoqalernissaa massakkut sulianik nutaanillu suliakkerneqarnerit kivikkuminaatsinneqalersinnaanerat, Ilulissani borgmestereqarfimmit oqaatigineqarpoq.

Ole Dorphip ilanngullugu oqaatigaa, piffissami qanittumi Kim Kielsenimik ataatsimeeqateqarnissaq neriuutigalugu, tamanna pillugu Aasianni ataatsimiinnissaraluup taamaatinneqarnerata kingorna.

Atuaruk: Qaasuitsoq pillugu Siumumi avissaartuunneq