Qaasuitsoq

Qaasuitsup Kommuniani qaqqani annaassiniaasartut 17-t nutaat

Kommuni ukiumut arlaleriarluni annaassiniaasarpoq

Nuummi Ukkusissami 2013-imi annaassiniarnermit assi, tassani Østrigimiut takornariat sisamat annaanneqarput

Qaasuitsup Kommuniani annaassiniarnermut upalungaarsimasuisa qatserisartut 17-t Upernavimmeersut, Uummannameersut, Ilulissaneersut kiisalu Qeqertarsuarmeersut qaqqami annaassiniarnermut ilinniarteqqammerpaat.

Ilinniarneq uuma qaammatip aallartinnerani Ilulissani pivoq, annaassiniarnermut upalungaarsimasut ilisimatitsipput.

Assit takukkit: Ukkusissami annaassiniarneq

Qaqqani annaassiniarneq tassaavoq, annaasiniartartut upalungaarsimasut amerlanertigut nunakkut pisuttunik imaluunniit arpattunik napparsimaneq imauunniit ajoquserneq pissutigalugu qaqqakkut allunaasalerluni, sumiiffinni tikikkuminaattuni inuit qimagussortinneqarlutik annaanniarneqartarput.

Annaassiniarnerit arlallit
- Qaasuitsup Kommuniani malunnartumik takornariat amerlatsikkiartorput, taakkulu illoqarfiit qimallugit pinngortitamut namminneq misigisassarsiorusuttarput. Ukiumullu arlaleriarluni annaassiniarnermut upalungaarsimasut ajoqusersimasunik ikiuisarput, upalungaarsimanermut pisortaq, Bjarne Gregersen, tusgassiuutinut nalunaarummi ilisimatitsivoq.

Immikkut piumasaqaateqartoq
Qaqqami annaassiniarneq annaasiniartunut immikkut piumasaqaateqarpoq, suliassat taamaattut assersuutigalugu putunit imaluunniit portusuunit allanit annaassiniarnernit ajorunakusoornerujussuummata. Qaqqami annaassiniarnermi assersuutigalugu allunaasanik qaqqamut qilleraluni aalajangiinissaq pingaaruteqarpoq.

Ilinniarnissaq sioqqullugu annaassiniarnermut upalungaarsimasoqarfik annaassiniarnermut atortussat aamma isumannaallisaatit pissarsiarisimavai.

Powered by Labrador CMS