Qaasuitsup Kommunia
Qaasuitsup avinneqarnissaa pillugu oqaloqatigiittoqaqqissaaq
Misissueqqissaarineq BDO-mit suliarineqarsimasoq maanna suliarineqareerpoq Naalakkersuinikkullu Ataqatigiissaarisoqatigiinnullu saqqummiunneqarsimalerpoq
Qaasuitsup Kommuniata avinneqarnissaa sulissutigineqaqqilerpoq.
Naalakkersuinikkut Ataqatigiissaarisoqatigiit (KANUKOKA´p siulittaasua, borgmesterit sisamaasut aamma Naalakkersuisut) ataatsimiinnerminni Qaasuitsup Kommuniata avinneqarsinnaanera, 2017-imi ataatsimoortumik tapiissutissat kommuninullu suliassanik siunissami nuussinissanut tunngaviit oqallisigaat.
Misissueqqissaarineq BDO-mit suliarineqarsimasoq maanna suliarineqareerpoq Naalakkersuinikkullu Ataqatigiissaarisoqatigiinnullu saqqummiunneqarsimalerluni.
Naliliinerit oqallisigineqassapput
Qaasuitsup Kommuniani kommunalbestyrelsimit nalunaarusiat oqallisigineqarnissaat tamatumalu kingornatigut Naalakkersuisunut inassuteqaasiornissaat isumaqatigiissutigineqarpoq, Naalakkersuisullu tamatuma kingornatigut Inatsisartunut aalajangiiffigisassatut siunnersuusiussallutik.
- Kommuninut suliassanik nuussinissaq siuarsarniarlugu ilaatigut sanaartornermi suliassat immikkoortullu akimorlugit assigiimmik sulisoqarnissaa qulakkeerniarlugu, 2017-imi ataatsimoortumik tapiissutinik suliaralugit aallartinnginneranni ataatsimut tunngavissanik akuersinissaq pisariaqartutut nalilerneqarpoq, Naalakkersuinikkut Ataqatigiissaarisoqatigiit allapput.