meeqqat inuusuttullu

Qaasuitsumi meeqqat maanna isummersorfeqalerput

Naalakkersuisup Sara Olsvigip aamma Qaasuitsup Kommuniani borgmesterip Ole Dorphip Nakuusap aamma kommunip akornanni isumaqatigiissut atsiorpaat

Naalakkersuisup Sara Olsvigip aamma Qaasuitsup Kommuniani borgmesterip Ole Dorphip Nakuusap aamma kommunip akornanni isumaqatigiissut atsiorpaat. Tamanna ippassaq pingasunngornermi pivoq

Kommunit tamarmik massakkut meeqqat isummersortarfiinik peqalerput.

Kommuninit sisamaasunit Qaasuitsup Kommunia kingulliulluni Nakuusamik isumaqatigiissuteqarluni pingasunngornermi atsiorpoq, Meeqqat Isummersorfiat taamaalilluni kommunimi pilersinneqarpoq, kiisalu pisinnaatitaaffinnut siunnersuisoqatigiit Nakuusaaqqat kommunip atuarfiini tamani pilersinneqarput.

Isumaginninnermut, ilaqutariinnut, naligiissitaanermut inatsisinillu atuutsitsinermut naalakkersuisup Sara Olsvigip (IA) aamma Qaasuitsup Kommuniani borgmesterip Ole Dorphip Nakuusap aamma kommunip akornanni isumaqatigiissut atsiorpaat.

Atuaruk: Nakuusa: Meeqqat affaasa maanna pisinnaatitaaffitik ilisimavaat

Meeqqanik peqataatitsineq
Nakuusami suliamik aqutsisup, Najaaraq Møllerip, kommunit tamarmik meeqqanut isummersorfeqalermata nuannaarpoq.

- Kommunit tamarmik maanna atsiorsimalerneranni oqarsinnaanngorpugut asseqanngitsumik nunatsinni meeqqat sinerissamiittut tamarluinnaasa akuutinneqarnissaannut sinaakkummik peqalerluta. Massakkumiit sinaakkutip taassuma atorluarneqalernissaanut sumiiffinnullu tulluarsarnissaannut sulilluta aallartissinnaanngorpugut, taanna tusagassiuutinut nalunaarummi oqarpoq.

Qaasuitsup Kommuniani Meeqqat Isummersorfiat 12-nik ilaasortaaffigineqarpoq, taakkuussallutillu kommunimi politikerinut siunnersuuteqartartussat. Atuarfinni isummersoqatigiiffiit, Nakuusaaqqat, atuartunit annernit ilaasortaaffigineqassapput, taakkuussallutillu kommunip iluani meeqqat tamaasa sinnerlugit oqaaseqartartuusussat.

Nakuusap Qaasuitsumi ilinniartitsisut ukioq manna pikkorissartussaavaat, tamanna illoqarfinni nunaqarfinnilu amerlaqisuni meeqqat sunniuteqaqataasinnaanerannut qulakkeerinnittussaassammat.

Siusinnerusukkut Qeqqata Kommunia, Kommuneqarfik Sermersooq kiisalu Kommuni Kujalleq assigisaanik Naalakkersuisoqarfik isumaqatigiissuteqarfigereerpaat.

Powered by Labrador CMS