kommunimut qinersineq
Qaasuitsumi IA: Aatsitassalerinermi sulisoqarneq naleqqussarli
Qaasuitsup Kommuniata aningaasaqarnera aalisarnerup kisimi napatissinnaanngikkaa, Bendt B. Kristiansen oqaatigaa. Aatsitassalerinermilu sulisunik naleqqussaasoqarnissaa sulissutigerusuppaa
- Sulisartoqarneq aningaasatigut ineriartoqqinnermi tunngaviussooq.
Qaasuitsup Kommiani kommunalbestyrelsimut qinigassanngortittoq, Bendt B. Kristiansen, Inuit Ataqatigiit, taaama oqarpoq.
Aalisarnermi aningaasatigut ineriartorneq Qaasuitsup Kommunianut malunnaatilimmik ineriartortitsisoq oqaatigaa.
- Taamaakkaluartoq sulisartukkormiunut tamanna annerusumik malunnaataasimanngilaq. Suliffissaaleqisut ikilisassagutsigit avaqqussinnaanngilarput inuussutissarsiornikkut periarfissat nutaamik nalilersorneqarnissaat, nutaaliornikkut sulisartullu aatsitassarsiornerup periarfissarititaanut tulluussarneqarnerisigut, Bendt B. Kristiansen, tusagassiuutinut nalunaarummini oqarpoq.
Atuaruk: IA: Illoqarfiit pingaarnersaanni pilersaarut kommunit sinnerinut pisussaaffiliivoq
Annertunerusumik pilersaarusiorneq
Inuiaqatigiit siunissami aningaasaqarnerannut kivitsinissamut inuusuttut 24-it tungaannut ukiullit, Bendt B. Kristiansenip pingaaruteqarnerarpai.
- 24-it tungaannut ukiullit pilersaarusiorluarnikkut ukiuni tulliuttuni 5-10-ni sulisinnaassutsikkut qaffassarneqarlutillu ilinniarfinnut aqqutissiorneqassapput, ilaatigut Piorsaaviliornikkut inuttut ineriartornermik sulisinnaassutsimillu pikkorissarlugit pilersaarusiuunneqarnerisigut.
Eqaannerusumik sulisoqarneq
- Ilulissat nunat tamalaat akornanni mittarfissuartaarnissaani periarfissat nutaat piulerumaartussat sulisartoqarnikkut tulluussarfigineqassapputtaaq, taamaattumik Inuit Ataqatigiit sulissutigissuarput mittarfissuartaarnissap malitsigiumaagassai qulaajarumallugit sulisitsisunut sulisartunullu isumasioqatigiisitsinissaq, oqaatigaa.
Ukiuni aggersuni sulisartoqarnerup inerisaqqinnissaani suliassaqarpugut annertuunik, oqaatigaa.
Inuit Ataqatigiinnit aqqutissiuutissuarput sulisartut tulluussarsinnaassusillit, nuttarsinnaassusillit piumassuseqartullu pilersitseqataaffiginissaat, Bendt B. Kristiansen oqarpoq.
Atuaruk: IA-meersoq: Kanukoka aggulunneqassappat matuinnaraanni assigaa