Qaasuitsup Kommunia
Qaasuitsoq pillugu Siumumi avissaartuunneq
Inatsisartuni ilaasortat sisamat Siumumeersut Kim Kielsen (S), Qaasuitsoq avinneqarnissaanut kommuni nammineq akiliissanerarlugu oqaaseqartoq isumaqatiginngilaat
Qaasuitsup Kommuniata avinneqarnerani qanoq ingerlanneqarnissaanik Siumumi isumaqatigiinngissutigineqarpoq.
Tassami Nalaakkersuinikkut Ataqatigiissaarisoqatigiit ataatsimiinneranni Naalakkersuisut siulittaasuat, aamma Siumumi siulittaasuusoq, Kim Kielsen oqarpoq, kommunip avinneqarneranut aningaasartuutit 'nunap sinneranut aningaasanut inatsit aqqutigalugu tutsinneqartariaqanngillat'.
Atuaruk: Kim Kielsen: Qaasuitsoq avitsinermut nammineq akiliissaaq
Naalakkersuisut akisussaaffeqarput
Siumumit Inatsisartuni ilaasortat sisamat, Anders Olsen, Suka K. Frederiksen, Jess Svane aamma Jens Imanuelsen taamatut oqariartuuteqarneq isumaqatigineqanngilaq.
- Naalakkersuisut aamma Inatsisartut Kanukoka aqqutigalugu kommunit tapersersornissaannut pisussaaffeqarput. Tassami kommunit innuttaasunut qaninnerpaallutik sulimmata. Taamaammallu Qaasuitsup Kommuniata avinneqarneranut kommunip nammineq akiliinissaaneq oqaaseqarneq isumaqatiginngilarput, taakku Inatsisartuni ilaasortat sisamat ataatsimut tusagassiuutinut nalunaarnerminni allapput.
Taasineq ataqqisiuk
Qaasuitsup Kommuniata nutaamik avinneqarnissaanut ukioq kingulleq taasinerup inernera ataqqineqartariaqartoq taakku isumaqarput. Piffinnut isorliunerusunut kommunit kattunneqarnerat kinguneqartitsingaatsiarsimasoq naqissusiipput.
- Taamaammat Nalaakkersuinikkut Ataqatigiissaarisoqatigiit kommunit qaninnerusumik suleqatigalugit tapersersortariaqarpaat, aammalu Qaasuitsup Kommuniani innuttaasut qinersinerat ataqqillugu, Anders Olsen, Suka K. Frederiksen, Jess Svane aamma Jens Imanuelsen taama oqariartuuteqarput.
Aamma atuaruk: Qaasuitsoq: Kommunep avinnissaa amerlanerussuteqarluartut taperserpaat
Kommunip avinneqarnissaanut allaaserisat tamaasa uani atuakkit