Qaasuitsoq
Qaasuitsoq nakkutigineqarunnaarpoq
Qaasuitsup Kommuniata aningaasaqarnera ilimagisamit pitsaaneruvoq. Taamaattumik Qaasuitsup Kommunia Namminersorlutillu Oqartussat isumaqatigiissutigaat kommuni sakkortusisamik nakkutigineqarunnaassasoq
Kommuni 2015-imi apriilimi sakkortusisamik nakkutigineqalerpoq, kassekreditini 60 millioner koruunit taarsersoruminaatsimmagit, 2009-mi kommunit kattunneqarnerannut atatillugu akiligassarilersimasani.
Qaasusuitsup Kommunia taarsigassarsiami akilernissaata sivitsorneqarnissaanik Namminersorlutik Oqartussanut qinnuteqarmat isumaqatigiissummut ilaasomavoq kommup aningaasaqarnera sakkortusissamik nakkutigineqalissasoq. Maannali tamanna qaangiuppoq.
– Piffissami aningaasaliissutissanik annertuunik atorfissaqartitsiffimmif kommuni akulerukkusuppoq, nuannaarutigaaralu nalunaarutigisinnaagakku kommuni Nammonersorlutik Oqartussanit sakkortusisamik nakkutigineqarunnaartoq. Tamatumunnga pissutaavoq kommunip aningaasaqarnini aqullualersimammagu sakkortuumik aningaasanik aqutsinikkut, ataqatigiissaarinikkut kiisalu isertitat amerlisarneqarnerisigut, Qaasuitsup Kommuniani borgmesteri Ole Dorph oqarpoq.
Naalakkersuisut aamma iluarinnipput:
– Nuannerpoq kommunip aningaasaqarnini aqullualersimammagu, taamaasilluni taarsigassani naatsorsuutigisamit sukkanerusumik taarsersorsinnaalerlugit, aningaasaqarnrmut Naalakkersuisoq Randi Vestergaard Evaldsen oqarpoq.