meeqqat inuusuttullu
Qaasuitsoq Naalakkersuisunit ikiorneqassaaq
Naalakkersuisup aamma borgmesterip ataatsimeereernerisa kingorna, Qaasuitsumi meeqqat iliiuseqarfigineqarnissaannut unammilligassarujussuit qanimut suleqatigiissutiginissaat pilersinneqassasoq isumaqatigiissutigineqarpoq
Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsenip Qaasuitsup Kommuniani Borgmesteri Ole Dorph ataatsimeeqatigivaa.
Ataatsimeeqatigiinnerup tunngavigaa MIO-p ukiup massuma aallartisimalernerani Meeqqat Illersuisuata Upernavik Uummannallu nunaqarfiinut angalasimaneranut nalunaarusiaq.
Atuaruk: Meeqqat illersuisuat: Qaasuitsup isornartorsiorneqarnertik nuannarinngilaat
Isorartunera unamminartoq
- Qaasuitsup Kommuniani meeqqat inuusuttullu atugarissaarnissaat pingaarteqaagut. Sulisugut piumassuseqarluartuupput, suliassanullu imaannaanngitsunut annertuumik suliaqarlutik, taamaattorli nassuerutigisariaqarpoq kommuunitta isorartunerujussuata inoqarfiillu avinngarusimaqisut pissutigalugit suliassaq annertuumik unamminartuutimmagu, Qaasuitsup Kommuniani borgmesteri oqarpoq.
Ataatsimiinnermi Qaasuitsup Kommuniani meeqqat inuusuttullu atugarisaat eqqartorneqarput, Namminersorlutik Oqartussat allapput. Ataatsimiinneq suliassanut imaannaanngitsunut, ataatsimoorussamik suleqatigiiffiusumillu iliuseqartoqarnissaanik isumaqatigiiffiusumik naammassineqarpoq.
Maanna aallartittoq
Isumaqatigiissutigineqarpoq kommuunip suliassaqarfinnut tapersersorneqarnissaminnut pisariaqartitai aallaavigalugit Ilaqutariinnermut, Naligiissitaanermut Isumaginninnermullu Naalakkersuisoqarfik ikiuutissasoq.
- Nuannaarutigaara suliassaqarfiit meeqqanut inuusuttunullu tunngasut maannangaaq 2015-imiit suleqatigiissutigisinnaagatsigit. Suleqatigiinneq ajunngilluinnartumik isumaginninnerup iluani aallarteriikkatta saniatigut tapertaassaaq, ataatsimeereernerup kingorna naalakkersuisoq oqarpoq.
Atuaruk: Qaasuitsup Kommuniata meeqqat pisinnaatitaaffii unioqqutippai