kommunit avinneqarnerat
Qaasuitsoq avinneqalinngilaq
Qaasuitsup Kommuniata avinneqarnissaanut taasisitsisoqarnerani eqqortumik tunngaveqanngitsoq, Naalakkersuinikkut Ataqatigiissaarisoqatigiit isumaqarput
Qaasuitsup Kommunia avinneqalinngilaq, naak innuttaasut marsimi 2014-imi avinneqarnissaanut taasisitsisoqarmat angeraluartut.
Atuaruk: Qaasuitsoq: Kommunep avinnissaa amerlanerussuteqarluartut taperserpaat
Naalakkersuinikkut Ataqatigiissaarisoqatigiit tamanna pillugu ataatsimeereernerisa kingorna, Namminersorlutik Oqartussat taama ilisimatitsipput.
Tassani gruppemiipput, kommunit kattuffiat KANUKOKA, borgmesterit sisamat aamma Naalakkersuisut.
Naalakkersuisut siulittaasuata, Kim Kielsenip (S), kommunit sisamaasut ilaat ataaseq avinneqassappat inuiaqatigiinnut akisuallaassasoq tassunga atatillugu tikkuarpaa. Aammalu avinneqarnissaanut aalajangiineq sioqqullugu aningaasaqarnikkut kingunerisinnaasaat innuttaasut ilisimasariaqaraat.
Atuaruk: Kim Kielsen: Qaasuitsoq avitsinermut nammineq akiliissaaq
- Qaasuitsup Kommunianit avitsinnissaq pillugu inunnik taasisitsinissaq sioqqullugu innuttaasut aningaasaqarnikkut kingunerisinnaasaat pillugit paasitinneqarsimanngillat. Innuttaasunut kommunip avinneqannginnerani kingunerisinnaasanik ilisimatinneqartariaqartut Naalakkersuisut isumaqarput. Kommuninik A, B imaluunniit C-nik pilersitsissanngikkutta allatut ajornartumik, Aaqqissuussaanermut Isumalioqatigiissitamit 2005-imi naliliivigineqarsimasutut kommuneqartariaqarpugut suliassanik naammassinnissinnaanissanik pitsaasumik piumasaqaatinut kivitsisinnaasunik, Kim Kielsen tusagassiuutinut nalunaarummi taama erseqqissaavoq,
Kommunit avinneqarnissaat pillugu allaaserisat uani atuakkit
- Aammaarlunga erseqqissaatigissavara, pingaarnerunngimmat innuttaasut Namminersorlutik Oqartussanit imaluunniit kommuninit sullissinermik isumaginnittuuppata, pingaarnerpaavorli innuttaasunut pitsaanerpaamik pimoorussinerpaamillu sullissineq angusinnaassagutsigu, Naalakkersuisunut siulittaasoq ilanngullugu taama oqarpoq.