kommuninut qinersineq 2017
Qaasuitsoq Avannarlermi Siumut Atassullu suleqatigiilersut
Kommuneqarfiit avannarlersaanni Atassut borgmesterimut
Qaasuitsoq Avannarlermi Siumup Atassut suleqatigissavaa. Partiit taakku marluk tusagassiuutinut nalunaaruteqarput.
Isumaqatigiissutaasimasumi Siumut borgmesterinngortitsissaaq Atassulli borgmesterimut sinniisussanngortinneqarluni.
Kina borgmesterimut sinniisussanngussanersoq suli nalunaarutigineqanngilaq, Atassummilu taaguulluarneqarnerpaasimasoq, Aqqalu Jerimiassen periarfissagissaarpoq.
Atuaruk: Qaasuitsoq Avannarlermi Siumup Naleraq suleqatigerusukkaa
Suleqatigiilertussat isumaqatigiissutigisimasartik ullumi nalunaaqutaq 11.00 tamanut saqqummiutissavaat.
Ullut matuma siorna Siumut, Partii Nalerarlu isumaqatiginninniartut, borgmesterinngortussa Palle Jerimiassenip nalunaarutigaa.
Atuaruk: Taaguunneqarluanngikkaluarluni borgmesterinngulersoq
Aammattaaq partiip piumasaqaatitik Atassummut nassiussimavaat, piumasaqaatillu isumaqatigiissutigineqarsimapput.
Partiit tamarmik tutsuiginartumik isumaqatiginninniarfigineqarsimanngitsut, Demokraatit isumaqarput.
- Siumut ataqatigiissaarisui ataasiarluta kaffisoqatigivagut suleqatigiissinnaanermik ujartuisinnaaneq pillugu, ajoraluartumilli Siumukkut annerusumik oqaloqatigeqqikkusulluta saaffiginnissuterput qisuariarfigisimanngilaat, tamassumallu takuteqqippaa Siumukkut siammasissumik suleqateqarneq pimoorutinngikkaa, pissaanerli pingaartinnerullugu suliniarnertik ingerlanniaraat, partiip kommunalbestyrelsimi ilaasortaatitatuaa, Lena Ravn Davidsen oqarpoq.
Atuaruk: Aqqalu Jerimiassen: Isumaqatiginninniarnerni aajuku piumasaqaatikka
Taassuma oqaatigaa meeqqat atuarfiisa pitsaassusaata angusaatalu qaffassarnissaat, meeqqanut suliassat uninngaannartut aallunneqarnissaat, inuussutissarsiornermilu siuarsaanissaq ukiuni sisamani tulliuttuni pingaartillugit sulissutiginiarlugit.