Qaasuitsoq Avannarleq: Suli pissanganartorsiortut

Qanorluunniit inerneqariaannaavoq.

Taama Qaasuitsup Avannarlermi marlunngormat kommunalbestyrelsimut qinersereernerup kingorna inerniliisoqarsinnavoq. Siumut 47,6 procentinit qinerneqarsimavoq taamaasillunilu kisermaassilluni pissaanermik tigummiarsinnaanani. Borgmesteriutitaqassagunillu partiinik allanik suleqateqartariaqarluni.

Unnukkut nalunaaqutaq ataatsip missaani Qaasuitsoq Avannarlermi kina borgmesterinngorsinnaanera ersarissumik eqqoriarneqarsinnaasimanani.

Palle Jerimiassen Iluliarmiu 155-nik taaguunneqarsimavoq, Ane Lone Bagger Iluliarmioqataa 149-nik taaguunneqarsimalluni.

- Siumumi ileqquuvoq taaguunneqarnerpaaq borgmesterinngortinneqartarnera. Qinersinerullu aallartinnginnerani, Siumut Qaasuitumi ataqatigiissaarinermut ataatsimiititaliaa qinikkat peqatigalugit kina borgmesterinngortinneqassanersoq isumaqatigiissutiginikuuarput. Partiimma tatigalugu toqqassappanga, borgmesteritut sulinissara piareersimaffigaara, Palle Jerimiassen oqarpoq.

Siumut qinigassanngortitai allat aamma borgmesterimut soqutiginnillutik qinersinerup aallartinnginnerani soqutiginnillutik nalunaaruteqarnikuupput, taakkuli naligiittorujussuupput. Tassaasut Ane Lone Bagger 149-nik qinerneqarsimasoq Sakio Fleischerilu Uummannarmiu 138-nik qinerneqarsimasoq. Jens Immanuelseni Upernavimmiu 123-nik qinerneqarsimavoq.

- Maanna partiinik allanik isumaqatiginninniassuugut. Partiinik allanik mattusserusunngilagut, Qaasuitsoq Avannarlermilu partiit tamaasa naapikkusuppagut, Palle Jerimiassen qassoqqalluni oqarpoq. Taassuma qinersisartut allat assigalugit Ilulissani inernerit sivisuumik utaqqisimavai. Attaveqaatikkut ajutoorneq pissutaalluni kisitsineq kinguaattoorsimavoq.