Qaartiterineq aallartillualivissoq
Kalaallit Airportsip Nuummi Ilulissanilu timmisartoqarfiliornermut atatillugu juulip aallaqqaataaniit oktoberip aallaqqaataata tungaanut qaartiterinissamut pilersaarutini saqqummiuteqqammerpai.
Juulip aallaqqaataaniit qaammatit pingasut tulliuttut ingerlaneranni Nuummi qaqqaq 1,1 millioner kubikmeteri qaartiterneqarnissaa pilersaarutaavoq. Qaartiterinernik suliaqarnerit suliassap nunaminertaata kujasinnerusortaani ingerlanneqarnerussapput, Kalaallit Airportsilli ilisimatitsissutigaa, qaartiterinerit aamma avannamut kangisissortaani pisinnaassasut.
Unnukkut quliniit ullaakkut arfineq-marluk tungaanut qaartiterisoqartassaaq, pilersaarutaavorli qillerinernut qamutit arlalissuit ataasinngornermiit arfininngornermut ulloq unnuarlu qillerisinneqartassasut. Sapaatikkut aamma qillerisoqartarsinnaavoq.
Ilulissanut tunngatillugu pilersaarut
Munck Gruppen Ilulissani qaartiterivallaannginnerussaaq. Ukiup qaammataani pingasuni kingullerni qaartiterinissamut pilersaarummi takuneqarsinnaavoq, qaqqaq 92.500 kubikmeteri qaartiterneqassasoq. Ilisimatitsissutigineqarpoq, qaartiterinermi aqqusinniornissaq sulisullu najugaqarfissaannik pilersitsinissaq siunertaasoq.
-Aqqusinniortoqareerpat qaqqap qanoq ittuuneranut tunngasut ilisimasaqarfigineqalissapput, tamannalu suliniuteqarfiup sinnerata qanoq piffissanilu suni qaartiterneqarnissaanut ilaassaaq, Kalaallit Airports Ilulissani suliassaq pillugu ilisimatitsivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...