Nunaqarfimmi taxa
Qaarsuni taxaqalissaaq
Nunaqarfiup Qaarsut mittarfiullu akornanni ingerlassisartussanik taxaqalernissaa qanittumi piviusunngorsinnaavoq
Uummannap eqqaani nunaqarfik Qaarsut qanittumi taxaqalissaaq biilinut illerngit nunaqarfiup mittarfiullu akornanni aqqutigalugu angallassisartussanik. Qaarsuitsup Kommuniani allaffeqarfip kommunalbestyrelsemut inassutigaa utaqqiisaagallartumik taxanik ingerlatsinissamut akuersisoqassasoq.
- Taamaasiorsimavianngikkaluarpugut taxatillit arlaata tamanna ingerlassinnaasuuppagu, Qaarsuni mittarfimmi pisortaq Ib Larsen Sermitsiaq.AG-mut oqarpoq.
Qaarsuni biilituaasut tassaapput Pilersuisup aamma Mittarfeqarfiit biilii. Ilaasunilli angalassinermut mittarfiup biiliit atoqqusaanngillat. Taamaammat pitsorluttut utoqqaallu 4 kilometeri mittarfimmut pisuttariaqartarput timmisartumik angalassagaangamik.
Nunaqarfimmi takornariat
- Taxanik ingerlatsisinnaanermut akuersissummik qinnuteqarpugut ilaasunik angallassinermi inatsisit maleruarniarlugit. Mittarfeqarfiit biiliutai ilaasunik angallassillutik ajutuussagaluarpata tamanna sillimmasiisarfimmit matussuserneqarsinnaanngilaq. Taxanilli ingerlatsinermut akuerisaagutta inatsisit malillugit sulisinnaalissaagut, Ib Larsen nassuiaavoq.
Taamaattoq akuersissut utaqqiisaaginnaq atuuttussaq tunniunneqassannguatsiarpoq. Qaarsunik inerlatsinermut akuersissummik qinnuteqaat kommunalbestyrelsep pingasunngornermi ataatsimiinnermini isummerfigissavaa. Qaasuitsup Kommuniata allattoqarfiata inassutigaa ukiumut ataatsimuugallartoq akuersissummik tunniussisoqassasoq.
Qaarsuni taxaqalerpat ilaasut aqqusaartut nunaqarfimmut alakkaanissamut periarfissaqalissapput.
- Assersuutigalugu takornariat allallu Qaarsut nunaqarfianut takusaarusuttut angallanneqarsinnaalissapput. Ilaasummi ilaat nalunaaquttap akunneri pingasut angullugit mittarfimmi utaqqisariaqartarput 4 kilometerilu siumut utimullu pisunniarunik piffissarujussuaq atortariaqarlugu, Ib Larsen oqarpoq.