Qaarsormiut tupaqqapput

Katersortarfik taamaallaat 70-inik inissaqaraluartoq innuttaasut hunnorujut sinneqartut marlunngormat ataatsimiisitsinermi peqataapput. Innuttaasunik ataatsimiisitsinermi Karrani qaqqap sisooratarsinnaaneranut misissuinerit nutaat saqqummiunneqarput.

- Innuttaasut amerlasoorpassuit katersortarfik ulikkaalugu katersuupput. Tupaallattullu malunnarpoq. Nuuttoqarusussappat sianerfissaq saqqumitinneqarpoq, tamannalu innuttaasunit maluginiarneqarpoq, Edvard Nielsen Sermitsiaq.AG-imut oqaluttuarpoq.

Taanna qinigaaffiup siuliani nunaqarfimmi aqutsisuuvoq, maannalu Avannaata Kommuniani kommunalbestyrelsissat inissitsiterlutik ataatsimiilerpata aamma nunaqarfimmi aqutsisunngoqqinnissani naatsorsuutigalugu.

Amerlasuut angerlarsimaffeerussapput

Karrani qaqqaq sisooriaannaq anginerpaaq sisuussappat Qaarsunni innuttaasut 113-t angerlarsimaffii qarsunneqassapput. Pilersuisoq Nukissiorfiillu aamma eqqorneqassallutik. Taama pisoqassappat nunaqarfik sarfaarutissaaq imermillu kissartuerussalluni. Edvard Nielsenip nujagaa ulorianartorsiorfiup avataaniippoq, taamaammat aatsaat ajorluinnartumik pisoqarpat allamut nuunnissartik takorloorpaa.

- Qujartumik uagut illorput tiffasissumiikkami. Maaniikkallarnissarput eqqarsaatigivara. Ajutuuissortoqassappat aatsaat nuussuunga, Edvard Nielsen oqarpoq.

Politiit tarnillu pissusaanik ilisimasallit Naalakkersuisut innuttaasunik ataatsimiisitsinerani peqataammata toqqissisimanartoq, taanna aamma oqaluttuarpoq. Nunaqarfimmi tassaarsuaqarsinnaaneranik kingullermik paasisaqaramik tusagassiuutit aqqutigalugit tusarlerneqarput.