Qaannat unammersuarnerat: Arne Nielsenip ulloq pigaa
Uummannarmiut marloriaammik angutini inersimasuni qaannat pissartanngorniunneranni ajugaapput pingasunngornermi takisuumut parruttoqarmat. Angusat assillu takukkit
Arne Nielsenip Uummannameersup takutippaa ukiut apeqqutaanngitsut timi sungiusarluarsimatillugu. Taanna 54-nik ukiulik qajartortartoq angutit inersimasut takisuumut parrunneranni Nunatsinni pissartanngorpoq unammersuarnerni ulluni makkunani pisuni.
Unammisut Nuutoqqamiit aallarmatali Arne Nielsen siuarpoq nunaqqanni ukiunik pingasunik nukarleq Apollo Zeeb ingiaqatigeqqaarlugu, ingerlaarnerminnili Arne Nielsen siuariartuinnavippoq Siorarsiorfimmi nerngallassinnarlutik Qinngorput avaqqussinnarlugu Qeqertat akornisigoorsinnarlutik Nuutoqqamut apuukkiartoramik angumasassaajunnaarluni siuarpoq atorsimallugit akunnerit 1.43,06.
Apollo Zeebip atorsimavai akunnerit 1.43,53. 35-nik ukiulik Kunuunnguaq Davidsen Sisimiuneersoq pingajuuvoq atorsimallugit akunnerit 1.45,22.
Arnani inersimasuni pissartanngorpoq Angerlaq A. Olsen, Maliina Amondsen tullersortaavoq Paninnguaq Olsvig pingajuusoq. Taakku tamarmik Nuummeersuupput ingerlaarfiallu angutit ingerlaarfianniit naannerulluni.