Qaannamik Unammersuarneq: Pokaalit ingerlaartut tunniunneqarput
Nunatsinni coronap tuniluunnera peqqutigalugu qaannamik unammersuarnerit marlunngormat unitsinneqarput. Peqataasut 92-it unammersuarnertik suli naammassinngikkaluaraat illoqarfinni angusarissaarnerpaat pokaalissaannik tunineqassasut Qaannat Kattuffiata aalajangiuppaa.
Qaannamik unammersuarneq Nuutoqami ingerlanneqartoq inuit akornanni aliikkutarineqarlualeraluarpoq. Illoqarfinni assigiinngitsunili coronap tuniluunnera peqqutaalluni unammersuarneq marlunngormat unitsinneqarpoq. Naak unammersuarnerit unitsinneqaannaraluartut illoqarfiit angusarissaarnerpaat pokaalimik ingerlaartumik tunineqassasut Qaannat Kattuffiata aalajangiuppaa.
Meeqqat Qaqortumeersut pokaali tiguaat. Taakkua katillugit 435 pointinnapput, Nuummiut 180-inik katersipput, Iluliarmiullu 159 Tiniteqilaameersullu katillugit 57 pointinik katersisimallutik.
- Meeqqat Qaqortumeersut angusarissaanerpaapput. Taakkua pokaali ingerlaartartoq angerlaatissavaat. Silami pokali tunniupparput maleruaqqusallu malippagut. Maleruaqqusat allanngortinnagit ullaaq manna qulinut pokaali tunniupparput, Qaannat Kattuffiani siulittaasunngorlaaq, Johanne B. Tobiassen Sermitsiaq.AG-imut oqarpoq.
Nuummiut ajugaangaatsiartut
Inersimasut unammersuarnerini Nuummiut pointinik katersinerpaapput. Taakkua katillugit 728 pointinik katersipput, Iluliarmiut 506, Qaqortormiut 396 Tiniteqilaameersullu 15 pointinik katersisimallutik.
- Nuummi unnugu nalunaaqutaq 19:30 pokaali ingerlaartartoq tunniussavarput. Suli naluarput sumiissanerluta, Johanne B. Tobiassen oqarpoq.
Saaqqusersornermi inersimasut pointii ilaatinneqanngillat angutit naammassillutik unamminnginnerat peqqutigalugu.
Assimi uani ataaniittumi takusinnaavasi Qaqortumeersut Belinda Lange aamma Paulus Jensen qajartullammanngortut.