Qaannamik unammersuarneq ingerlalluartoq

Nuummi qaannamik unammersuartoqarnerani sila ulluni makkunani atoruminarpoq. Naatsumut takisuumullu sapaatip akunnerata naanerani parruttoqarpoq. Sapaatip akunnerata ingerlanerani silarluttussaanera peqqutaalluni pilersaarutit allanngortinneqalaarput.

- Qannaamik unammersuarneq maannammut ingerlalluarpoq. Annertunerusumik ajoqusertoqarnikuunngilaq, Peqatigiiffik Qajaq Nuummi siulittaasoq, Pavia Tobiassen oqarpoq.

Danny Klamer tallimanik ukiulik Nuummeersoq naatsumik takisuumillu meeqqat sisamaniit arfinillit tungaanut ukiulinnut parrunnermi pissartanngorpoq. Nelas Enoksen (Nuuk) tulliuvoq Qaqortumeersorlu Søren M. Frederiksen pingajuattut inissisimalluni. Niviarsiaqqani arfineq-marlunniit qulingiluat tungaanut ukiulinni Natuk Mølgaard siulliulluni naatsumik parrunnermi apuuppoq. Takisuumillu parrunnermi Arnannguaq Jensen Petersen Ilulissaneersoq pissanngortanngorpoq.

Pilersaarutillu sila pissutaalluni allannguuteqarput.

- Pilersaarutit allanngortilaarnikuuagut. Ataasikkaarluni sapaatiummat kinngusaqattaartoqartussaagaluarpoq silalu peqqutaalluni takisuumik parrunneq sapaatiummamut nuupparput. Taamaalilluni unamminerit pingaarnerit qaangiupput, sulilu allanik unammisaqattaartoqarpoq, Pavia Tobiassen oqarpoq.

Takisuumik parrunnermi ajugaasut

Takisuumik parrunnermi angutit 20 km-it qajartorfigaat arnallu 15 km-it ingerlaarlugit.

Angutini 20-iniit 34-inut ukiulinni Arik Josefsen Nuummersoq pissartanngorpoq. Kristian Evaldsenilu aamma Nuummeersup aappaattut inissilluni. Qaqortumeersoq Paulus Jensen pingajuattut inissippoq. Angutinilu 35-iniit 49-t tungaanut ukiulinni Peqatigiiffik Qajaq Nuummi siulittaasoq Pavia Tobiassen pissartanngorpoq, Abel Jakobsen Qaqortumeersoq aappaattut inissilluni, Ilulissaneersorlu John Eliassen pingajuattut inissilluni.

- Arlallit ujalliminnik anniarput, kisianni annertunerusumik ajoqusertoqanngilaq. Maannamut ingerlalluangaaratta ilaanni pilersaarutit malillugit siuaqqasarpugut, Pavia Tobiassen oqarpoq.

Arnani 35-iniit 49-t tungaanut ukiulinni takisuumik parrunnermi Ida Nielsen (Nuuk) pissartanngorpoq. Taanna akunneq ataallugu takisuumik parruppoq. Sofie Rosa Jakobsen Qaqortumeersoq aappaattut inissippoq. Ilulissaneersorlu Nukannguaq Aura Johansen pingajuattut inissippoq, taanna akunneq ataaseq minutsinilu tallimani pissartanngortumiit kingulliuvoq.

Arnani utoqqasaani 50-iniit 59-inut ukiulinni Johanne B. Tobiassen kisiartaalluni unammeqataagami pissartanngorpoq. Angutinilu John Pedersen Ilulissaneersoq pissartanngorpoq Max Odinbergilu Tiniteqilaameersoq aappaattut inissilluni John Jensenilu Ilulissaneersoq pingajuattut inissilluni.

Angutini peqataasuni utoqqaanersaasut akornanni Hanseeraq Kleemann Nuummeersoq pissartanngorpoq, 70-inillu ukiulik Peter Olsen Ilulissaneersoq aappaattut inissilluni.

Peqataasut tamarmik qajartullammanngornissaminnut point-inik katersipput. Point-eqarnerpaat unammersuarneq naammassippat, tassa arfininngorpat juulip 17-ani saqqummiunneqarumaarput.

Powered by Labrador CMS