Qaanaaq: Inunnut innarluutilinnut sullissisut taarseraattut

Qaanaami inunnut innarluutilinnut sullissisut amigaatigineqangaatsiarput. Sulisulli aamma taarserarmata, Qaanaami inuit innarluutillit ikiortissarsiorniarnerat ajornaatsuinnaasanngilaq.

Tilioq Qaanaami 20.-27. maj angalareerluni taama inerniliussaqarpoq.

Sulisoqarniarneq Avannaata Kommunianit piaartumik aaqqiivigineqarsinnaasoq, inuit innarluutillit illersuisuat Christina Johnsen isumaqarpoq:

- Inunnut innarluutilinnut sullissisut piginnaanngorsarnissaannut kiisalu sulisoriuarneqarnissaannut qanoq iliuuseqartoqarniarpa? Tassami inunnut innarluutilinnut sullissisut amingaatigineqarput sulisullu taarseraannerat annertoorujussuuvoq, taamaasillutik inuit innarluutillit ikiorneqarnissamik kommunimut saaffiginnikkaangamik akineqanngitsoortarput imaluunniit suliat aallaqqaataaneqqattaartuarneqartarput, inuit innarluutillit illersuisuat Christina Johnsen Avannaata Kommuniani ataatsimiinnermi ilaatigut taama oqariartuuteqarpoq

Kommunemi ataatsimiinneq

Qaanaami angalareernerup kingorna Avannaata Kommuniani ataatsimiittoqarpoq. Avannaata Kommuniani Ilaqutareeqarnermut Ingerlatsivimmi pisortaq Aviaja Madsen, Immikkoortortami pisortaagallartoq Karen Lund Fleischer aamma inunnut innarluutilinnut siunnersorti Malo Madsen ataatsimeeqataapput, kiisalu Ilaqutareeqarnermut ataatsimiititaliami siulittaasoq Apollo Mathiassen (S) oqarasuaatikkut peqataalluni.

Borgmester Palle Jerimiassen (S) kommunaldirektør Nick Nielsenilu ataatsimiinneq sioqqullugu peqataasinnaanatik nalunaarsimasut, Tilioq nittartakkamini ilisimatitsivoq.

Qaanaami angalanermini Tilioq innuttaasunut inuit innarluutillit pisinnaatitaaffii pillugit sammisassaqartitsivoq.

Qaanaamit angalanermit nalunaarusiamik ukiamut saqqummiinissani Tiliup naatsorsuutigaa.