Qaanaaq: Innarluutillit atugarisaat Tiliumit misissorneqassapput
Innarluutillit illersuisuat Christina Johnsen Tiliullu allaffeqarfiani sulisut qaammammi matumani Qaanaamut paasissarsiorlutik aallassapput
Tilioq inuit innarluutillit pisinnaatitaaffii qitiutilluit innuttaasunut sammisassaqartitsissaaq kiisalu innuttaasut saaffiginnissutaanik tigooqqassalluni.
Tamanna pissaaq ataasinngornermi maajip 25-ani marlunngornermilu maajip 26-ani, innarluutillit illersuisoqarfiat tusagassiorfinnut nalunaaruteqarnermi ilisimatitsivoq.
- Erinisuttupilussuuvunga Qaanaami inunnik innarluutilinnik, qanigisaannik sullissisunillu naapitsinissannut, tassami Qaanaarmiunik Tilioq 2017-miilli aamma saaffigineqartarpoq, nunatsinnilu inunnut innarluutilinnut tamanut illersuisutut pisussaaffeqarpunga inuit innarluutillit najugaannut tikillugit atugaannik misissuisarnissannut, saaffiginnissutigineqartartullu naapertorlugit tunngavissaqarluarpugut tikeraarnissatsinnut, Inuit innarluutillit illersuisuat Christina Johnsen oqarpoq.
Angalanermit nalunaarusiaq
Allaffeqarfimmi sulisut Avanersuup atuarfiani atuartunut nukarlernut, akullernut angajullernullu pulaassapput, tassani innnarluutillit pisinnaatitaaffii pillugit saqqummiussissapput, aamma immikkut atuartut pulaarneqassapput.
Tilioq Qaanaamut pularnerup saniatigut aamma Avannaata Kommuniani illoqarfiit pingaarnersaannut Ilulissanukassaq, Qaanaami innuttaasut innarluutillit qanoq kiffartuunneqartarnersut tusarniarlugu, Avannaata Kommuniani napparsimmavimmilu qullersat ataatsimeeqatiginiarlugit.
- Qaanaamut paasisassarsiorluni angalanerup kingorna nalunaarusiussaagut, tassanilu Qaanaami inuit innarluutillit atugaannik misissuinitsinni paasisanik imaqassaaq, soorlu aamma pitsanngorsaataasinnaasunik Naalakkersuisunut, Peqqinnissaqarfimmut inuiaqatigiinnullu inassuteqaatinik imaqarumaarluni, inuit innarluutillit illersuisuat Christina Johnsen oqarpoq.